KHush-nawai tere nairang se Dar lagta hai

ḳhush-navā.ī tere nairañg se Dar lagtā hai

marhabā suniye to āhañg se Dar lagtā hai

ho kharā baañT to tulne se nahīñ koī gurez

haañ magar jumbish-e-pāsañg se Dar lagtā hai

maslahat kā ye kafan rakhtā hai be-dāġh hameñ

ahl-e-īmān haiñ ham-rañg se Dar lagtā hai

ham jo talvār uThā leñ to qayāmat aa jaa.e

haañ magar ye ki hameñ jañg se Dar lagtā hai

fāsla dil kā hai duniyā se mahz ik farsañg

aur hameñ bas usī farsañg se Dar lagtā hai

Dar nahīñ lagtā kisī ḳhvāb se ham ko lekin

us kī ta.abīr kī farhañg se Dar lagtā hai

āhanī azm hoñ par aañkh bhī nam hai merī

bhīge mausam meñ mujhe zañg se Dar lagtā hai

sar ko dīvār se mahfūz rakhā hai pa 'nasīm'

apnī muTThī meñ chhupe sañg se Dar lagtā hai

KHush-nawai tere nairang se Dar lagta hai

marhaba suniye to aahang se Dar lagta hai

ho khara banT to tulne se nahin koi gurez

han magar jumbish-e-pasang se Dar lagta hai

maslahat ka ye kafan rakhta hai be-dagh hamein

ahl-e-iman hain ham-rang se Dar lagta hai

hum jo talwar uTha len to qayamat aa jae

han magar ye ki hamein jang se Dar lagta hai

fasla dil ka hai duniya se mahz ek farsang

aur hamein bas usi farsang se Dar lagta hai

Dar nahin lagta kisi KHwab se hum ko lekin

us ki tabir ki farhang se Dar lagta hai

aahani azm hon par aankh bhi nam hai meri

bhige mausam mein mujhe zang se Dar lagta hai

sar ko diwar se mahfuz rakha hai pa 'nasim'

apni muTThi mein chhupe sang se Dar lagta hai