KHush-rang-o-sahr-kar nazaron ko kya hua

ḳhush-rañg-o-sahr-kār nazāroñ ko kyā huā

allāh is chaman kī bahāroñ ko kyā huā

raushan thiiñ jin se bazm-e-tasavvur kī ḳhalvateñ

in rashk-e-mehr-o-māh sitāroñ ko kyā huā

sāhil ko pā sakī na kabhī kashtī-e-hayāt

dariyā-e-ārzū ke kināroñ ko kyā huā

apne parā.e ho ga.e qismat ke saath saath

majbūr zindagī ke sahāroñ ko kyā huā

naġhma ba-lab huuñ aur na naala ba-lab huuñ maiñ

sāz-e-junūn-o-ishq ke tāroñ ko kyā huā

lab-hā-e-lāla-gūñ haiñ aur ik talḳhī-e-itāb

mīThe tabassumoñ kī phuvāroñ ko kyā huā

muddat se gulsitāñ hai ba-rañg-e-ruḳh-e-marīz

'altāf' surḳh surḳh bahāroñ ko kyā huā

KHush-rang-o-sahr-kar nazaron ko kya hua

allah is chaman ki bahaaron ko kya hua

raushan thin jin se bazm-e-tasawwur ki KHalwaten

in rashk-e-mehr-o-mah sitaron ko kya hua

sahil ko pa saki na kabhi kashti-e-hayat

dariya-e-arzu ke kinaron ko kya hua

apne parae ho gae qismat ke sath sath

majbur zindagi ke sahaaron ko kya hua

naghma ba-lab hun aur na nala ba-lab hun main

saz-e-junun-o-ishq ke taron ko kya hua

lab-ha-e-lala-gun hain aur ek talKHi-e-itab

miThe tabassumon ki phuwaron ko kya hua

muddat se gulsitan hai ba-rang-e-ruKH-e-mariz

'altaf' surKH surKH bahaaron ko kya hua