KHush-shanasi ka sila karb ka sahra hun main

ḳhush-shanāsī kā sila karb kā sahrā huuñ maiñ

kaun pahchāne ki ik dasht-e-tamannā huuñ maiñ

sard paanī kī zabāñ chāTtī rahtī hai mujhe

kohar meñ Duubā huā koī jazīra huuñ maiñ

apnī vīrān sī āñkhoñ ko sajā lo mujh se

phir na haath ā.ūñgā uḌtā huuñ sapnā huuñ maiñ

bhuul jāoge mujhe tum bhī sahar hone tak

āḳhir-e-shab kā koī TūTtā lamha huuñ maiñ

TūTā-phūTā hī sahī phir bhī kashish rakhtā huuñ

mujh se mahzūz to ho lo ki khilaunā huuñ maiñ

ek dushnām hai ye tarz-e-ta.āruf mujh ko

yaaro is shahr kā derīna shanāsā huuñ maiñ

KHush-shanasi ka sila karb ka sahra hun main

kaun pahchane ki ek dasht-e-tamanna hun main

sard pani ki zaban chaTti rahti hai mujhe

kohar mein Duba hua koi jazira hun main

apni viran si aankhon ko saja lo mujh se

phir na hath aaunga uDta hun sapna hun main

bhul jaoge mujhe tum bhi sahar hone tak

aaKHir-e-shab ka koi TuTta lamha hun main

TuTa-phuTa hi sahi phir bhi kashish rakhta hun

mujh se mahzuz to ho lo ki khilauna hun main

ek dushnam hai ye tarz-e-taaruf mujh ko

yaro is shahr ka derina shanasa hun main