KHushbu ka bhi wahi hai jo hai chalan hawa ka

ḳhushbū kā bhī vahī hai jo hai chalan havā kā

us kā badan havā kā hai pairahan havā kā

kal raat yād-e-jānāñ yā chāñdnī ke baa.is

behad chamak rahā thā sīmāb-tan havā kā

sadiyoñ gayā vo us ke pīchhe had-e-jahāñ tak

lekin na DhūñD paayā mulk-o-vatan havā kā

apne badan se haT kar mahsūs kar sako to

tum ko dikhā.ī degā uryāñ badan havā kā

mere qarīb aa.ī ḳhushbū havā pahan kar

palTī to ban ga.ī thī ḳhud pairahan havā kā

tūfāñ ke ba.ad dekhā gulshan ke har shajar ne

be-dam paḌī thī ḳhushbū oḌhe kafan havā kā

KHushbu ka bhi wahi hai jo hai chalan hawa ka

us ka badan hawa ka hai pairahan hawa ka

kal raat yaad-e-jaanan ya chandni ke bais

behad chamak raha tha simab-tan hawa ka

sadiyon gaya wo us ke pichhe had-e-jahan tak

lekin na DhunD paya mulk-o-watan hawa ka

apne badan se haT kar mahsus kar sako to

tum ko dikhai dega uryan badan hawa ka

mere qarib aai KHushbu hawa pahan kar

palTi to ban gai thi KHud pairahan hawa ka

tufan ke baad dekha gulshan ke har shajar ne

be-dam paDi thi KHushbu oDhe kafan hawa ka