KHushbu ki tarah sath laga le gai hum ko

ḳhushbū kī tarah saath lagā le ga.ī ham ko

kūche se tire bād-e-sabā le ga.ī ham ko

patthar the ki gauhar the ab is baat kā kyā zikr

ik mauj bahar-hāl bahā le ga.ī ham ko

phir chhoḌ diyā reg-e-sar-e-rāh samajh kar

kuchh duur to mausam kī havā le ga.ī ham ko

tum kaise gire āñdhī meñ chhitnār darḳhto

ham log to patte the uḌā le ga.ī ham ko

ham kaun shanāvar the ki yuuñ paar utarte

sūkhe hue hoñToñ kī duā le ga.ī ham ko

is shahr meñ ġhārat-gar-e-īmāñ to bahut the

kuchh ghar kī sharāfat hī bachā le ga.ī ham ko

KHushbu ki tarah sath laga le gai hum ko

kuche se tere baad-e-saba le gai hum ko

patthar the ki gauhar the ab is baat ka kya zikr

ek mauj bahar-haal baha le gai hum ko

phir chhoD diya reg-e-sar-e-rah samajh kar

kuchh dur to mausam ki hawa le gai hum ko

tum kaise gire aandhi mein chhitnar darKHto

hum log to patte the uDa le gai hum ko

hum kaun shanawar the ki yun par utarte

sukhe hue honTon ki dua le gai hum ko

is shahr mein ghaarat-gar-e-iman to bahut the

kuchh ghar ki sharafat hi bacha le gai hum ko