KHushi daman-kashan hai dil asir-e-gham hai barson se

ḳhushī dāman-kashāñ hai dil asīr-e-ġham hai barsoñ se

hamārī zindagī kā ek hī aalam hai barsoñ se

sitam hai āñsuoñ kā poñchhne vaalā nahīñ koī

hamārī aañkh bhī tar āstīñ bhī nam hai barsoñ se

vazāhat chāhtā huuñ tujh se tere is ishāre kī

jo paiham merī jānib hai magar mub.ham hai barsoñ se

rahe ham saath bhī barsoñ tire kahlā.e bhī lekin

tujhe apnā na paa.e ye ḳhalish ye ġham hai barsoñ se

kisī se mudda.ā-e-dil kahā ho to zabāñ kaT jaa.e

bas ik tū hai jo dil ke raaz kā mahram hai barsoñ se

hamārī zindagī kahne kī had tak zindagī hai bas

ye shīrāza bhī dekhā jaa.e to barham hai barsoñ se

ḳhushī hai ai 'vaqār' ab aur na armān-e-ḳhushī baaqī

agar kuchh hai to bas āsūdgi-e-ġham hai barsoñ se

KHushi daman-kashan hai dil asir-e-gham hai barson se

hamari zindagi ka ek hi aalam hai barson se

sitam hai aansuon ka ponchhne wala nahin koi

hamari aankh bhi tar aastin bhi nam hai barson se

wazahat chahta hun tujh se tere is ishaare ki

jo paiham meri jaanib hai magar mubham hai barson se

rahe hum sath bhi barson tere kahlae bhi lekin

tujhe apna na pae ye KHalish ye gham hai barson se

kisi se muddaa-e-dil kaha ho to zaban kaT jae

bas ek tu hai jo dil ke raaz ka mahram hai barson se

hamari zindagi kahne ki had tak zindagi hai bas

ye shiraaza bhi dekha jae to barham hai barson se

KHushi hai ai 'waqar' ab aur na arman-e-KHushi baqi

agar kuchh hai to bas aasudgi-e-gham hai barson se