KHushi hai sab ko ki operation mein KHub nishtar ye chal raha hai

ḳhushī hai sab ko ki operation meñ ḳhuub nishtar ye chal rahā hai

kisī ko is kī ḳhabar nahīñ hai marīz kā dam nikal rahā hai

fanā isī rañg par hai qaa.im falak vahī chaal chal rahā hai

shikasta o muntashir hai vo kal jo aaj sāñche meñ Dhal rahā hai

ye dekhte ho jo kāsa-e-sar ġhurūr-e-ġhaflat se kal thā mamlū

yahī badan naaz se palā thā jo aaj miTTī meñ gal rahā hai

samajh ho jis kī balīġh samjhe nazar ho jis kī vasī.a dekhe

abhī yahāñ ḳhaak bhī uḌegī jahāñ ye qulzum ubal rahā hai

kahāñ kā sharqī kahāñ kā ġharbī tamām dukh sukh hai ye masāvī

yahāñ bhī ik bā-murād ḳhush hai vahāñ bhī ik ġham se jal rahā hai

urūj-e-qaumī zavāl-e-qaumī ḳhudā kī qudrat ke haiñ karishme

hamesha radd-o-badal ke andar ye amr political rahā hai

maza hai spēch kā dinner meñ ḳhabar ye chhaptī hai pionēr meñ

falak kī gardish ke saath hī saath kaam yāroñ kā chal rahā hai

KHushi hai sab ko ki operation mein KHub nishtar ye chal raha hai

kisi ko is ki KHabar nahin hai mariz ka dam nikal raha hai

fana isi rang par hai qaim falak wahi chaal chal raha hai

shikasta o muntashir hai wo kal jo aaj sanche mein Dhal raha hai

ye dekhte ho jo kasa-e-sar ghurur-e-ghaflat se kal tha mamlu

yahi badan naz se pala tha jo aaj miTTi mein gal raha hai

samajh ho jis ki baligh samjhe nazar ho jis ki wasia dekhe

abhi yahan KHak bhi uDegi jahan ye qulzum ubal raha hai

kahan ka sharqi kahan ka gharbi tamam dukh sukh hai ye masawi

yahan bhi ek ba-murad KHush hai wahan bhi ek gham se jal raha hai

uruj-e-qaumi zawal-e-qaumi KHuda ki qudrat ke hain karishme

hamesha radd-o-badal ke andar ye amr political raha hai

maza hai speech ka dinner mein KHabar ye chhapti hai pioneer mein

falak ki gardish ke sath hi sath kaam yaron ka chal raha hai