KHushi se ranj ka badla yahan nahin milta

ḳhushī se ranj kā badlā yahāñ nahīñ miltā

vo mil ga.e to mujhe āsmāñ nahīñ miltā

hazār DhūñDiye us kā nishāñ nahīñ miltā

jabīñ mile to mile āstāñ nahīñ miltā

majāz aur haqīqat kuchh aur hai yaanī

tirī nigāh se terā bayāñ nahīñ miltā

bhaḌak ke shola-e-gul tū hī ab lagā de aag

ki bijliyoñ ko mirā āshiyāñ nahīñ miltā

tirī talāsh kāfi-ul-jumla mā-hasal ye hai

ki tū yahāñ nahīñ miltā vahāñ nahīñ miltā

batā ab ai jaras-e-daur maiñ kidhar jā.ūñ

nishān-e-gard-e-rah-e-kārvāñ nahīñ miltā

mujhe bulā ke yahāñ aap chhup gayā koī

vo mehmāñ huuñ jise mezbāñ nahīñ miltā

tujhe ḳhabar hai tire tīr-e-be-panāh kī ḳhair

bahut dinoñ se dil-e-nā-tavāñ nahīñ miltā

kisī ne tujh ko na jaanā magar ye kam jaanā

ye raaz hai ki koī rāz-dāñ nahīñ miltā

mujhe aziiz sahī qadr-e-dil tumheñ kyuuñ ho

kamī to dil kī nahīñ dil kahāñ nahīñ miltā

dayār-e-umr meñ ab qahat-e-mehr hai 'fānī'

koī ajal ke sivā mehrbāñ nahīñ miltā

KHushi se ranj ka badla yahan nahin milta

wo mil gae to mujhe aasman nahin milta

hazar DhunDiye us ka nishan nahin milta

jabin mile to mile aastan nahin milta

majaz aur haqiqat kuchh aur hai yani

teri nigah se tera bayan nahin milta

bhaDak ke shola-e-gul tu hi ab laga de aag

ki bijliyon ko mera aashiyan nahin milta

teri talash kafi-ul-jumla ma-hasal ye hai

ki tu yahan nahin milta wahan nahin milta

bata ab ai jaras-e-daur main kidhar jaun

nishan-e-gard-e-rah-e-karwan nahin milta

mujhe bula ke yahan aap chhup gaya koi

wo mehman hun jise mezban nahin milta

tujhe KHabar hai tere tir-e-be-panah ki KHair

bahut dinon se dil-e-na-tawan nahin milta

kisi ne tujh ko na jaana magar ye kam jaana

ye raaz hai ki koi raaz-dan nahin milta

mujhe aziz sahi qadr-e-dil tumhein kyun ho

kami to dil ki nahin dil kahan nahin milta

dayar-e-umr mein ab qahat-e-mehr hai 'fani'

koi ajal ke siwa mehrban nahin milta