KHushk dariya mein iztirab aae

ḳhushk dariyā meñ iztirāb aa.e

saare sāhil hī zer-e-āb aa.e

un ko samjhā gulāb sahrā meñ

merī rāhoñ meñ vo sarāb aa.e

un ke jaane se shor-e-tanhā.ī

un ke aane se inqalāb aa.e

bojh palkoñ pe rakh liyā un kā

jo ki ḳhvāboñ meñ be-hisāb aa.e

lafz-o-ma.anī kā toḌ de rishta

pesh phir bhī vahī kitāb aa.e

mere ġham se havā bhī ālūda

yaḳh-zada jaa.e sho.ala-tāb aa.e

saada paanī sharāb lagtā hai

jab kisī par 'zafar' shabāb aa.e

KHushk dariya mein iztirab aae

sare sahil hi zer-e-ab aae

un ko samjha gulab sahra mein

meri rahon mein wo sarab aae

un ke jaane se shor-e-tanhai

un ke aane se inqalab aae

bojh palkon pe rakh liya un ka

jo ki KHwabon mein be-hisab aae

lafz-o-mani ka toD de rishta

pesh phir bhi wahi kitab aae

mere gham se hawa bhi aaluda

yaKH-zada jae shoala-tab aae

sada pani sharab lagta hai

jab kisi par 'zafar' shabab aae