KHu-e-gham dil ko hai yani his-e-gham kuchh bhi nahin

ḳhū-e-ġham dil ko hai ya.anī his-e-ġham kuchh bhī nahīñ

kyā hai ab kār-gah-e-nāz-o-sitam kuchh bhī nahīñ

roz-e-fariyād se maġhlūb nahīñ tāqat-e-shukr

jabr-e-taqdīr-e-girāñ bārī-e-ġham kuchh bhī nahīñ

zindagī muzda-e-ġham maut naved-e-ġham-e-nau

koī rūdād ba-har-shān-e-karam kuchh bhī nahīñ

ik taraf hashr meñ tū ek taraf bahr-e-karam

dāman-e-tar to ab ai dīda-e-nam kuchh bhī nahīñ

darḳhur-e-be-ḳhudī-e-dil na alam hai na surūr

zahr-e-ġham kuchh bhī nahīñ sāġhar-e-jam kuchh bhī nahīñ

farq-e-zarf-e-dil-o-paimāna-e-taqdīr na pūchh

us ne bharpūr diyā aur use ġham kuchh bhī nahīñ

kyā ḳhabar kyā hai ye hañgāma-e-hastī 'mānī'

ham ko itnā to hai mālūm ki ham kuchh bhī nahīñ

KHu-e-gham dil ko hai yani his-e-gham kuchh bhi nahin

kya hai ab kar-gah-e-naz-o-sitam kuchh bhi nahin

roz-e-fariyaad se maghlub nahin taqat-e-shukr

jabr-e-taqdir-e-giran bari-e-gham kuchh bhi nahin

zindagi muzda-e-gham maut nawed-e-gham-e-nau

koi rudad ba-har-shan-e-karam kuchh bhi nahin

ek taraf hashr mein tu ek taraf bahr-e-karam

daman-e-tar to ab ai dida-e-nam kuchh bhi nahin

darKHur-e-be-KHudi-e-dil na alam hai na surur

zahr-e-gham kuchh bhi nahin saghar-e-jam kuchh bhi nahin

farq-e-zarf-e-dil-o-paimana-e-taqdir na puchh

us ne bharpur diya aur use gham kuchh bhi nahin

kya KHabar kya hai ye hangama-e-hasti 'mani'

hum ko itna to hai malum ki hum kuchh bhi nahin