KHu samajh mein nahin aati tere diwanon ki

ḳhū samajh meñ nahīñ aatī tire dīvānoñ kī

dāmanoñ kī na ḳhabar hai na girebānoñ kī

jalva-e-sāġhar-o-mīnā hai jo ham-rañg-e-bahār

raunaqeñ turfa taraqqī pe haiñ mai-ḳhānoñ kī

har taraf be-ḳhudī o be-ḳhabarī kī hai numūd

qābil-e-dīd hai duniyā tire hairānoñ kī

sahl is se to yahī hai ki sambhāleñ dil ko

minnateñ kaun kare aap ke darbānoñ kī

aañkh vaale tirī sūrat pe miTe jaate haiñ

sham-e-mahfil kī taraf bhiiḌ hai parvānoñ kī

ai jafākār tire ahd se pahle to na thī

kasrat is darja mohabbat ke pashīmānoñ kī

rāz-e-ġham se hameñ āgāh kiyā ḳhuub kiyā

kuchh nihāyat hī nahīñ aap ke ehsānoñ kī

dushman-e-ahl-e-muravvat hai vo begāna-e-uns

shakl pariyoñ kī hai ḳhū bhī nahīñ insānoñ kī

hamrah-e-ġhair mubārak unheñ gul-gasht-e-chaman

sair ham ko bhī mayassar hai bayābānoñ kī

ik bakheḌā hai nazar meñ sar-o-sāmān-e-vajūd

ab ye hālat hai tire soḳhta-sāmānoñ kī

faiz-e-sāqī kī ajab dhuum hai mai-ḳhānoñ meñ

har taraf mai kī talab maañg hai paimānoñ kī

āshiqoñ hī kā jigar hai ki haiñ ḳhursañd-e-jafā

kāfiroñ kī hai ye himmat na musalmānoñ kī

yaad phir taaza huī haal se tere 'hasrat'

qais o farhād ke guzre hue afsānoñ kī

KHu samajh mein nahin aati tere diwanon ki

damanon ki na KHabar hai na girebanon ki

jalwa-e-saghar-o-mina hai jo ham-rang-e-bahaar

raunaqen turfa taraqqi pe hain mai-KHanon ki

har taraf be-KHudi o be-KHabari ki hai numud

qabil-e-did hai duniya tere hairanon ki

sahl is se to yahi hai ki sambhaalen dil ko

minnaten kaun kare aap ke darbanon ki

aankh wale teri surat pe miTe jate hain

sham-e-mahfil ki taraf bhiD hai parwanon ki

ai jafakar tere ahd se pahle to na thi

kasrat is darja mohabbat ke pashimanon ki

raaz-e-gham se hamein aagah kiya KHub kiya

kuchh nihayat hi nahin aap ke ehsanon ki

dushman-e-ahl-e-murawwat hai wo begana-e-uns

shakl pariyon ki hai KHu bhi nahin insanon ki

hamrah-e-ghair mubarak unhen gul-gasht-e-chaman

sair hum ko bhi mayassar hai bayabanon ki

ek bakheDa hai nazar mein sar-o-saman-e-wajud

ab ye haalat hai tere soKHta-samanon ki

faiz-e-saqi ki ajab dhum hai mai-KHanon mein

har taraf mai ki talab mang hai paimanon ki

aashiqon hi ka jigar hai ki hain KHursand-e-jafa

kafiron ki hai ye himmat na musalmanon ki

yaad phir taza hui haal se tere 'hasrat'

qais o farhad ke guzre hue afsanon ki