KHub-ru sab hain magar hura-shamail ek hai

ḳhūb-rū sab haiñ magar hūrā-shamā.il ek hai

aur mah-pāra haiñ lekin māh-e-kāmil ek hai

haq-ta.ālā us ke zulfoñ se bachā.e al-hazar

sāmnā hai do balāoñ kā mirā dil ek hai

kaun sā rāhat-rasāñ ma.ashūq hai āfāq meñ

dūsrā bhī āfat-e-jāñ hai jo qātil ek hai

maiñ taḌaptā huuñ to kahte haiñ asīrān-e-qafas

zaḳhm-ḳhurda ham giraftāroñ meñ bismil ek hai

jis kā jī chāhā chalā aayā baġhair az ittilā.a

aap kī sarkār meñ bāzār-o-mahfil ek hai

sham' chaltī hai to parvāne bhī jal jaate haiñ saath

vaah kyā in 'āshiq-o-mā'shūq kā dil ek hai

rind-o-zāhid donoñ pūchheñge barābar dekhnā

tafarqe un meñ dorāhe tak hai manzil ek hai

us kī zulfoñ kā tasavvur hai jo har dam dil-nashīñ

maiñ samajhtā huuñ ki do lailā haiñ mahmil ek hai

jo muārrif kāmiloñ ke thī agar hotī vo aaj

ham ko bhī kahte ye apnī fan meñ kāmil ek hai

'bahr' apnī bhī fasāhat jānte haiñ ahl-e-fahm

dūsre ham haiñ agar sahbān-o-i.l ek hai

KHub-ru sab hain magar hura-shamail ek hai

aur mah-para hain lekin mah-e-kaamil ek hai

haq-taala us ke zulfon se bachae al-hazar

samna hai do balaon ka mera dil ek hai

kaun sa rahat-rasan mashuq hai aafaq mein

dusra bhi aafat-e-jaan hai jo qatil ek hai

main taDapta hun to kahte hain asiran-e-qafas

zaKHm-KHurda hum giraftaron mein bismil ek hai

jis ka ji chaha chala aaya baghair az ittilaa

aap ki sarkar mein bazar-o-mahfil ek hai

sham' chalti hai to parwane bhi jal jate hain sath

wah kya in 'ashiq-o-ma'shuq ka dil ek hai

rind-o-zahid donon puchhenge barabar dekhna

tafarqe un mein dorahe tak hai manzil ek hai

us ki zulfon ka tasawwur hai jo har dam dil-nashin

main samajhta hun ki do laila hain mahmil ek hai

jo muarrif kaamilon ke thi agar hoti wo aaj

hum ko bhi kahte ye apni fan mein kaamil ek hai

'bahr' apni bhi fasahat jaante hain ahl-e-fahm

dusre hum hain agar sahban-o-il ek hai