KHubi ka teri bas-ki ek aalam gawah hai

ḳhūbī kā terī bas-ki ik aalam gavāh hai

apnī baġhair dekhe hī hālat tabāh hai

aalam sunā jo naaz kā hai us se al-amāñ

andāz-e-guftugū se ḳhudā kī panāh hai

tevrī ke Dhab haiñ aur nigah ke hazār Dol

chitvan ke laakh rañg ġharaz vaah vaah hai

nāḳhun ye dil hilāl hai abrū ke rashk se

mukhḌe kā daaġh rakhtā kaleje pe maah hai

ḳhūñ-rez terī chashm ko batlāte haiñ vale

chitvan meñ saath kahte haiñ phir uzr-ḳhvāh hai

ḳhūbī kā tere bāloñ kī mazkūr hai jahāñ

sumbul kā naam is jagah ik rū-siyāh hai

detā hai terī qāmat-e-dil-jū kā jo patā

be-sāḳhta vo khīñchtā ik dil se aah hai

go 'lutf'-e-ḳhufta-baḳht ke aao na ḳhvāb meñ

lekin tire ḳhayāl ko nit dil meñ raah hai

KHubi ka teri bas-ki ek aalam gawah hai

apni baghair dekhe hi haalat tabah hai

aalam suna jo naz ka hai us se al-aman

andaz-e-guftugu se KHuda ki panah hai

tewri ke Dhab hain aur nigah ke hazar Dol

chitwan ke lakh rang gharaz wah wah hai

naKHun ye dil hilal hai abru ke rashk se

mukhDe ka dagh rakhta kaleje pe mah hai

KHun-rez teri chashm ko batlate hain wale

chitwan mein sath kahte hain phir uzr-KHwah hai

KHubi ka tere baalon ki mazkur hai jahan

sumbul ka nam is jagah ek ru-siyah hai

deta hai teri qamat-e-dil-ju ka jo pata

be-saKHta wo khinchta ek dil se aah hai

go 'lutf'-e-KHufta-baKHt ke aao na KHwab mein

lekin tere KHayal ko nit dil mein rah hai