KHubiyan apne mein go be-intiha pate hain hum

ḳhūbiyāñ apne meñ go be-intihā paate haiñ ham

par har ik ḳhūbī meñ daaġh ik aib kā paate haiñ ham

ḳhauf kā koī nishāñ zāhir nahīñ afa.āl meñ

go ki dil meñ muttasil ḳhauf-e-ḳhudā paate haiñ ham

karte haiñ taa.at to kuchh ḳhvāhāñ numā.ish ke nahīñ

par gunah chhup chhup ke karne meñ mazā paate haiñ ham

diida o dil ko ḳhayānat se nahīñ rakh sakte baaz

garche dast-o-pā ko aksar be-ḳhatā paate haiñ ham

dil meñ dard-e-ishq ne muddat se kar rakkhā hai ghar

par use ālūda-e-hirs-o-havā paate haiñ ham

ho ke nādim jurm se phir jurm karte haiñ vahī

jurm se go aap ko nādim sadā paate haiñ ham

haiñ fidā un dostoñ par jin meñ ho sidq o safā

par bahut kam aap meñ sidq o safā paate haiñ ham

go kisī ko aap se hone nahīñ dete ḳhafā

ik jahāñ se aap ko lekin ḳhafā paate haiñ ham

jānte apne sivā sab ko haiñ be-mehr o vafā

apne meñ gar shamma-e-mehr-o-vafā paate haiñ ham

buḳhl se mansūb karte haiñ zamāne ko sadā

gar kabhī taufīq-e-īsār o atā paate haiñ ham

ho agar maqsad meñ nākāmī to kar sakte haiñ sabr

dard-e-ḳhud-kāmī ko lekin be-davā paate haiñ ham

Thaharte jaate haiñ jitne chashm-e-ālam meñ bhale

haal nafs-e-dūñ kā utnā hī burā paate haiñ ham

jis qadar jhuk jhuk ke milte haiñ buzurg o ḳhurd se

kibr o naaz utnā hī apne meñ sivā paate haiñ ham

go bhalā.ī karke ham-jinsoñ se ḳhush hotā hai jī

tah-nashīñ us meñ magar durd-e-riyā paate haiñ ham

hai ridā-e-nek-nāmī dosh par apne magar

daaġh rusvā.ī ke kuchh zer-e-ridā paate haiñ ham

raah ke tālib haiñ par be-rāh paḌte haiñ qadam

dekhiye kyā DhūñDhte haiñ aur kyā paate haiñ ham

nuur ke ham ne gale dekhe haiñ ai 'hālī' magar

rañg kuchh terī alāpoñ meñ nayā paate haiñ ham

KHubiyan apne mein go be-intiha pate hain hum

par har ek KHubi mein dagh ek aib ka pate hain hum

KHauf ka koi nishan zahir nahin afaal mein

go ki dil mein muttasil KHauf-e-KHuda pate hain hum

karte hain taat to kuchh KHwahan numaish ke nahin

par gunah chhup chhup ke karne mein maza pate hain hum

dida o dil ko KHayanat se nahin rakh sakte baz

garche dast-o-pa ko aksar be-KHata pate hain hum

dil mein dard-e-ishq ne muddat se kar rakkha hai ghar

par use aaluda-e-hirs-o-hawa pate hain hum

ho ke nadim jurm se phir jurm karte hain wahi

jurm se go aap ko nadim sada pate hain hum

hain fida un doston par jin mein ho sidq o safa

par bahut kam aap mein sidq o safa pate hain hum

go kisi ko aap se hone nahin dete KHafa

ek jahan se aap ko lekin KHafa pate hain hum

jaante apne siwa sab ko hain be-mehr o wafa

apne mein gar shamma-e-mehr-o-wafa pate hain hum

buKHl se mansub karte hain zamane ko sada

gar kabhi taufiq-e-isar o ata pate hain hum

ho agar maqsad mein nakaami to kar sakte hain sabr

dard-e-KHud-kaami ko lekin be-dawa pate hain hum

Thaharte jate hain jitne chashm-e-alam mein bhale

haal nafs-e-dun ka utna hi bura pate hain hum

jis qadar jhuk jhuk ke milte hain buzurg o KHurd se

kibr o naz utna hi apne mein siwa pate hain hum

go bhalai karke ham-jinson se KHush hota hai ji

tah-nashin us mein magar durd-e-riya pate hain hum

hai rida-e-nek-nami dosh par apne magar

dagh ruswai ke kuchh zer-e-rida pate hain hum

rah ke talib hain par be-rah paDte hain qadam

dekhiye kya DhunDhte hain aur kya pate hain hum

nur ke hum ne gale dekhe hain ai 'haali' magar

rang kuchh teri alapon mein naya pate hain hum