KHun bahane ka bahana hai bhala mere baad

ḳhuuñ bahāne kā bahāna hai bhalā mere ba.ad

tiin din paan bhī khānā na zarā mere ba.ad

fātiha paḌh ke vo rone jo lagā mere ba.ad

shor-e-mahshar mire madfan pe uThā mere ba.ad

dil-e-ahbāb na madfan pe jalā misl-e-charāġh

phir ga.ī aisī zamāne kī havā mere ba.ad

qabr ko takiya-e-āġhosh banā kar baiThā

mere qātil kā kahīñ dil na lagā mere ba.ad

kārvāñ meñ pas-o-pesh ek hai manzil sab kī

ho ga.ī rehlat-e-har-shāh-o-gadā mere ba.ad

TukḌe hogā mere ġham meñ sar-e-sāġhar saaqī

kaaT Dālegī surāhī bhī galā mere ba.ad

na rahā bulbul o parvāna ko ishq-e-gul-o-sham.a

naam ko bhī koī āshiq na rahā mere ba.ad

us sā māshūq jahāñ meñ koī mujh sā āshiq

'arsh' aage na huā thā na huā mere ba.ad

KHun bahane ka bahana hai bhala mere baad

tin din pan bhi khana na zara mere baad

fatiha paDh ke wo rone jo laga mere baad

shor-e-mahshar mere madfan pe uTha mere baad

dil-e-ahbab na madfan pe jala misl-e-charagh

phir gai aisi zamane ki hawa mere baad

qabr ko takiya-e-aghosh bana kar baiTha

mere qatil ka kahin dil na laga mere baad

karwan mein pas-o-pesh ek hai manzil sab ki

ho gai rehlat-e-har-shah-o-gada mere baad

TukDe hoga mere gham mein sar-e-saghar saqi

kaT Dalegi surahi bhi gala mere baad

na raha bulbul o parwana ko ishq-e-gul-o-shama

nam ko bhi koi aashiq na raha mere baad

us sa mashuq jahan mein koi mujh sa aashiq

'arsh' aage na hua tha na hua mere baad