KHun-e-dil se rah-e-hasti ko farozan kar len

ḳhūn-e-dil se rah-e-hastī ko farozāñ kar leñ

mo'atabar aur bhī ham jashn-e-gulistāñ kar leñ

daur par daur chale jaam ko raqsāñ kar leñ

dostoñ aao ilāj-e-ġham-e-daurāñ kar leñ

ik na.e rañg se taz.īn-e-gulistāñ kar leñ

laakh ho daur-e-ḳhizāñ jashn-e-bahārāñ kar leñ

phir na chhaT jaa.eñ kahīñ ranj-o-mehan ke bādal

apnī zulfoñ ko zarā aap pareshāñ kar leñ

sham' phir hasrat-o-armān kī raushan kar ke

chand lamhoñ ko sahī jashn-e-charāġhāñ kar leñ

justujū aur na.ī bahr-e-husūl-e-manzil

apnī raftār sū-e-ḳhār-e-muġhīlāñ kar leñ

ġham-e-daurāñ ko ai 'jāñbāz' bhulāne ke liye

aao maiḳhāne meñ tafrīh kā sāmāñ kar leñ

KHun-e-dil se rah-e-hasti ko farozan kar len

mo'atabar aur bhi hum jashn-e-gulistan kar len

daur par daur chale jam ko raqsan kar len

doston aao ilaj-e-gham-e-dauran kar len

ek nae rang se tazin-e-gulistan kar len

lakh ho daur-e-KHizan jashn-e-bahaaran kar len

phir na chhaT jaen kahin ranj-o-mehan ke baadal

apni zulfon ko zara aap pareshan kar len

sham' phir hasrat-o-arman ki raushan kar ke

chand lamhon ko sahi jashn-e-charaghan kar len

justuju aur nai bahr-e-husul-e-manzil

apni raftar su-e-KHar-e-mughilan kar len

gham-e-dauran ko ai 'jaanbaz' bhulane ke liye

aao maiKHane mein tafrih ka saman kar len