KHun kis kis ka hua sadqe teri talwar par

ḳhuun kis kis kā huā sadqe tirī talvār par

fasl-e-gul dhabbe haiñ lākhoñ dāman-e-gulzār par

ab rahā dil tā-qayāmat abrū-e-ḳham-dār par

kyā haTegā vo jo gardan rakh chukā talvār par

fasl-e-gul ruḳhsat huī ro lījiye gulzār par

bas yahī do-tīn pañkhuḌiyāñ haiñ yā do-chār par

vasl-e-furqat kī shabeñ donoñ meñ niiñd aatī nahīñ

hañs rahā huuñ ro rahā huuñ tāla-e-bedār par

intihā par ishq aa kar ho gayā hai ain husn

maut kī bhī aañkh paḌtī hai tire bīmār par

vasl se māyūs ho kar kaam merā ban gayā

saikḌoñ iqrār sadqe ho ga.e inkār par

maiñ nahīñ lākhoñ paḌe haiñ muḌ ke pīchhe dekhiye

naqsh-e-pā ġhash khā ga.e haiñ shoḳhi-e-raftār par

daaġh vāloñ ke nasheman shab ko bhī chhupte nahīñ

dhuup sī phailī huī hai baaġh kī dīvār par

gardaneñ vo ḳham kiye haiñ jin ke sar haiñ bār-e-ḳhūñ

tū agar ḳhud-bīñ nahīñ Daal ik nazar talvār par

ashk-rezān-e-chaman se ḳhanda-e-gul dab gayā

os paḌtī hai na.ī har shab sar-e-gulzār par

ek ik rag de rahī hai lau vufūr-e-soz se

naaz hai 'sāqib' ko apne ḳhil.at-e-zar-tār par

KHun kis kis ka hua sadqe teri talwar par

fasl-e-gul dhabbe hain lakhon daman-e-gulzar par

ab raha dil ta-qayamat abru-e-KHam-dar par

kya haTega wo jo gardan rakh chuka talwar par

fasl-e-gul ruKHsat hui ro lijiye gulzar par

bas yahi do-tin pankhuDiyan hain ya do-chaar par

wasl-e-furqat ki shaben donon mein nind aati nahin

hans raha hun ro raha hun tala-e-bedar par

intiha par ishq aa kar ho gaya hai ain husn

maut ki bhi aankh paDti hai tere bimar par

wasl se mayus ho kar kaam mera ban gaya

saikDon iqrar sadqe ho gae inkar par

main nahin lakhon paDe hain muD ke pichhe dekhiye

naqsh-e-pa ghash kha gae hain shoKHi-e-raftar par

dagh walon ke nasheman shab ko bhi chhupte nahin

dhup si phaili hui hai bagh ki diwar par

gardanen wo KHam kiye hain jin ke sar hain bar-e-KHun

tu agar KHud-bin nahin Dal ek nazar talwar par

ashk-rezan-e-chaman se KHanda-e-gul dab gaya

os paDti hai nai har shab sar-e-gulzar par

ek ek rag de rahi hai lau wufur-e-soz se

naz hai 'saqib' ko apne KHilat-e-zar-tar par