KHun oDhe hue har ghar ka sarapa nikla

ḳhuun oḌhe hue har ghar kā sarāpā niklā

aap ke shahr kā andāz nirālā niklā

chhū ke ik shaḳhs ko parkhā to mulammā niklā

us ko maiñ kaisā samajhtā thā vo kaisā niklā

ruuh vīrān milī rañg parīda niklā

us ko nazdīk se dekhā to zamāna niklā

sach ke sahrā meñ unheñ DhūñD ke thak-hār ga.e

jhuuT ke shahr meñ yāroñ kā baserā niklā

ḳhush ho ai dhuup ke nezoñ se jhulasne vaalo

chāñd ke dosh pe sūraj kā janāza niklā

jis se katrā ke nikalte rahe barsoñ sar-e-rāh

us se kal haath milāyā to vo apnā niklā

kahīñ sahrā meñ bhī Das le na hameñ sairābī

ret ke batn se phunkārtā dariyā niklā

narm-rau thā to sabhī raah se muñh moḌ ga.e

sañg uThāyā to mire saath zamāna niklā

vādiyāñ lafz o ma.ānī kī tah-e-āb huiiñ

kin pahāḌoñ se ḳhayālāt kā jharnā niklā

KHun oDhe hue har ghar ka sarapa nikla

aap ke shahr ka andaz nirala nikla

chhu ke ek shaKHs ko parkha to mulamma nikla

us ko main kaisa samajhta tha wo kaisa nikla

ruh viran mili rang parida nikla

us ko nazdik se dekha to zamana nikla

sach ke sahra mein unhen DhunD ke thak-haar gae

jhuT ke shahr mein yaron ka basera nikla

KHush ho ai dhup ke nezon se jhulasne walo

chand ke dosh pe suraj ka janaza nikla

jis se katra ke nikalte rahe barson sar-e-rah

us se kal hath milaya to wo apna nikla

kahin sahra mein bhi Das le na hamein sairabi

ret ke batn se phunkarta dariya nikla

narm-rau tha to sabhi rah se munh moD gae

sang uThaya to mere sath zamana nikla

wadiyan lafz o maani ki tah-e-ab huin

kin pahaDon se KHayalat ka jharna nikla