KHun se jab jala diya ek diya bujha hua

ḳhuun se jab jalā diyā ek diyā bujhā huā

phir mujhe de diyā gayā ek diyā bujhā huā

apne to ahad-e-shauq ke marhale sab ajiib the

ham ko visāl sā lagā ek diyā bujhā huā

ek hī dāstān-e-shab ek hī silsila to hai

ek diyā jalā huā ek diyā bujhā huā

sho.ala havā-nazhād thā phir bhī havā ke haath ne

bas yahī faisla likhā ek diyā bujhā huā

mahfil-e-rañg-o-nūr kī phir mujhe yaad aa ga.ī

phir mujhe yaad aa gayā ek diyā bujhā huā

mujh ko nashāt se fuzūñ rasm-e-vafā aziiz hai

merā rafīq-e-shab rahā ek diyā bujhā huā

dard kī kā.enāt meñ mujh se bhī raushnī rahī

vaise merī bisāt kyā ek diyā bujhā huā

sab mirī raushni-e-jāñ harf-e-suḳhan meñ Dhal ga.ī

aur maiñ jaise rah gayā ek diyā bujhā huā

KHun se jab jala diya ek diya bujha hua

phir mujhe de diya gaya ek diya bujha hua

apne to ahad-e-shauq ke marhale sab ajib the

hum ko visal sa laga ek diya bujha hua

ek hi dastan-e-shab ek hi silsila to hai

ek diya jala hua ek diya bujha hua

shoala hawa-nazhad tha phir bhi hawa ke hath ne

bas yahi faisla likha ek diya bujha hua

mahfil-e-rang-o-nur ki phir mujhe yaad aa gai

phir mujhe yaad aa gaya ek diya bujha hua

mujh ko nashat se fuzun rasm-e-wafa aziz hai

mera rafiq-e-shab raha ek diya bujha hua

dard ki kaenat mein mujh se bhi raushni rahi

waise meri bisat kya ek diya bujha hua

sab meri raushni-e-jaan harf-e-suKHan mein Dhal gai

aur main jaise rah gaya ek diya bujha hua