KHwab aankhon se chune nind ko viran kiya

ḳhvāb āñkhoñ se chune niiñd ko vīrān kiyā

is tarah us ne mujhe be-sar-o-sāmān kiyā

ḳhāk-e-vīrāñ thā faqat hū ki sadā gūñjtī thī

merī vahshat ne bayābāñ ko bayābān kiyā

maiñ ne ik shaḳhs kī shā.ista-mizājī ke liye

apnī har ḳhvāhish-e-ḳhush-rañg ko qurbān kiyā

us ne jab chaak kiyā vajd meñ pairāhan-e-jāñ

maiñ ne bhī nazr-e-junūñ apnā girebān kiyā

umr bhar zabt kī dīvār na toḌī maiñ ne

aah khīñchī na kabhī rañj kā elaan kiyā

aks-e-hairat ke sivā kuchh na thā ā.īne meñ

apnī āñkhoñ ko bahut maiñ ne pareshān kiyā

phir bhī ta.amīr-e-tamannā kī na takmīl huī

maiñ ne āñgan ko kabhī dar kabhī dālān kiyā

baañT dī logoñ meñ us ne mirī daryūza-garī

phir mujhe 'aḳhtar'-e-kam-māya se sultān kiyā

KHwab aankhon se chune nind ko viran kiya

is tarah us ne mujhe be-sar-o-saman kiya

KHak-e-viran tha faqat hu ki sada gunjti thi

meri wahshat ne bayaban ko bayaban kiya

main ne ek shaKHs ki shaista-mizaji ke liye

apni har KHwahish-e-KHush-rang ko qurban kiya

us ne jab chaak kiya wajd mein pairahan-e-jaan

main ne bhi nazr-e-junun apna gireban kiya

umr bhar zabt ki diwar na toDi main ne

aah khinchi na kabhi ranj ka elan kiya

aks-e-hairat ke siwa kuchh na tha aaine mein

apni aankhon ko bahut main ne pareshan kiya

phir bhi tamir-e-tamanna ki na takmil hui

main ne aangan ko kabhi dar kabhi dalan kiya

banT di logon mein us ne meri daryuza-gari

phir mujhe 'aKHtar'-e-kam-maya se sultan kiya