KHwab aaram nahin KHwab pareshani hai

ḳhvāb ārām nahīñ ḳhvāb pareshānī hai

mere bistar meñ aziyyat kī farāvānī hai

mujh ko to vo bhī hai ma.alūm jo ma.alūm nahīñ

ye samaj-būjh nahīñ hai mirī nādānī hai

kuchh use sochne detā hī nahīñ apne sivā

merā mahbūb to mere liye zindānī hai

hai musībat meñ giraftār musībat merī

jo bhī mushkil hai vo mere liye āsānī hai

mauja-e-mai hai bahut mere sukūñ par betāb

zabt-e-girya se mire jaam meñ tuġhyānī hai

maiñ gunahgār-e-tamannā huuñ mujhe qatl karo

dil to haarā hai magar haar nahīñ maanī hai

KHwab aaram nahin KHwab pareshani hai

mere bistar mein aziyyat ki farawani hai

mujh ko to wo bhi hai malum jo malum nahin

ye samaj-bujh nahin hai meri nadani hai

kuchh use sochne deta hi nahin apne siwa

mera mahbub to mere liye zindani hai

hai musibat mein giraftar musibat meri

jo bhi mushkil hai wo mere liye aasani hai

mauja-e-mai hai bahut mere sukun par betab

zabt-e-girya se mere jam mein tughyani hai

main gunahgar-e-tamanna hun mujhe qatl karo

dil to haara hai magar haar nahin mani hai