KHwab-e-didar na dekha humne

ḳhvāb-e-dīdār na dekhā ham ne

ġhā.ebāna unheñ chāhā ham ne

kam na thā ishq azal se rusvā

kar diyā aur bhī rusvā ham ne

zindagī mahv-e-ḳhud-ārā.ī thī

aañkh uThā kar bhī na dekhā ham ne

raah se duur nazar aa.e jo ḳhaar

un ko palkoñ se uThāyā ham ne

le liyā koh-e-havādis sar par

vaqt ke dil ko na toḌā ham ne

kar diyā faash tirā ġham le kar

rāz-e-ejāz-e-masīhā ham ne

koh sañgīn haqā.eq thā jahāñ

husn kā ḳhvāb tarāshā ham ne

dard ālūda-e-darmāñ thā 'ravish'

dard ko dard banāyā ham ne

KHwab-e-didar na dekha hum ne

ghaebana unhen chaha hum ne

kam na tha ishq azal se ruswa

kar diya aur bhi ruswa hum ne

zindagi mahw-e-KHud-arai thi

aankh uTha kar bhi na dekha hum ne

rah se dur nazar aae jo KHar

un ko palkon se uThaya hum ne

le liya koh-e-hawadis sar par

waqt ke dil ko na toDa hum ne

kar diya fash tera gham le kar

raaz-e-ejaz-e-masiha hum ne

koh sangin haqaeq tha jahan

husn ka KHwab tarasha hum ne

dard aaluda-e-darman tha 'rawish'

dard ko dard banaya hum ne