KHwab-e-ghaflat se hum to ab TuTe

ḳhvāb-e-ġhaflat se ham to ab TuuTe

kis tarah ye tilsim-e-shab TuuTe

vo ḳhudā jaane mehrbāñ kab hoñ

silsila be-ruḳhī kā kab TuuTe

shakl apnī lage hai begānī

hādse ham pe kyā ajab TuuTe

bichh ga.ī har taraf saf-e-mātam

fauj-e-bātil pe aap jab TuuTe

jab yaqīnan ḳhatā hai āñkhoñ kī

shīsha-e-dil pe kyoñ ġhazab TuuTe

mo'tariz tum pe to zamāna thā

kis liye ham pe be-sabab TuuTe

hai hukūmat vahāñ pe shaitāñ kī

jis jagah rishta-e-adab TuuTe

jis meñ sach bolnā ho nā-mumkin

aisī bastī pe qahr-e-rab TuuTe

tum jahāñ raunaq-e-hayāt bano

zindagī kī vahāñ talab TuuTe

vo ḳhafā ham se kyā hue 'mashkūr'

jitne armān-e-dil the sab TuuTe

KHwab-e-ghaflat se hum to ab TuTe

kis tarah ye tilsim-e-shab TuTe

wo KHuda jaane mehrban kab hon

silsila be-ruKHi ka kab TuTe

shakl apni lage hai begani

hadse hum pe kya ajab TuTe

bichh gai har taraf saf-e-matam

fauj-e-baatil pe aap jab TuTe

jab yaqinan KHata hai aankhon ki

shisha-e-dil pe kyon ghazab TuTe

mo'tariz tum pe to zamana tha

kis liye hum pe be-sabab TuTe

hai hukumat wahan pe shaitan ki

jis jagah rishta-e-adab TuTe

jis mein sach bolna ho na-mumkin

aisi basti pe qahr-e-rab TuTe

tum jahan raunaq-e-hayat bano

zindagi ki wahan talab TuTe

wo KHafa hum se kya hue 'mashkur'

jitne arman-e-dil the sab TuTe