KHwab in aankhon se ab koi chura kar le jae

ḳhvāb in āñkhoñ se ab koī churā kar le jaa.e

qabr ke sūkhe hue phuul uThā kar le jaa.e

muntazir phuul meñ ḳhushbū kī tarah huuñ kab se

koī jhoñke kī tarah aa.e uḌā kar le jaa.e

ye bhī paanī hai magar āñkhoñ kā aisā paanī

jo hathelī se rachī mehñdī chhuḌā kar le jaa.e

maiñ mohabbat se mahaktā huā ḳhat huuñ mujh ko

zindagī apnī kitāboñ meñ chhupā kar le jaa.e

ḳhaak insāf hai nā-bīnā butoñ ke aage

raat thālī meñ charāġhoñ ko sajā kar le jaa.e

un se kahnā ki maiñ paidal nahīñ aane vaalā

koī bādal mujhe kāñdhe pe biThā kar le jaa.e

KHwab in aankhon se ab koi chura kar le jae

qabr ke sukhe hue phul uTha kar le jae

muntazir phul mein KHushbu ki tarah hun kab se

koi jhonke ki tarah aae uDa kar le jae

ye bhi pani hai magar aankhon ka aisa pani

jo hatheli se rachi mehndi chhuDa kar le jae

main mohabbat se mahakta hua KHat hun mujh ko

zindagi apni kitabon mein chhupa kar le jae

KHak insaf hai na-bina buton ke aage

raat thaali mein charaghon ko saja kar le jae

un se kahna ki main paidal nahin aane wala

koi baadal mujhe kandhe pe biTha kar le jae