KHwab ke rang dil-o-jaan mein sajae bhi gae

ḳhvāb ke rañg dil-o-jāñ meñ sajā.e bhī ga.e

phir vahī rañg ba-sad taur jalā.e bhī ga.e

unhīñ shahroñ ko shitābī se lapeTā bhī gayā

jo 'ajab shauq-e-farāḳhī se bichhā.e bhī ga.e

bazm shoḳhī kā kisī kī kaheñ kyā hāl-e-jahāñ

dil jalā.e bhī ga.e aur bujhā.e bhī ga.e

pusht miTTī se lagī jis meñ hamārī logo

usī dañgal meñ hameñ daav sikhā.e bhī ga.e

yād-e-ayyām ki ik mahfil-e-jāñ thī ki jahāñ

haath khīñche bhī ga.e aur milā.e bhī ga.e

ham ki jis shahr meñ the sog-nashīn-e-ahvāl

roz is shahr meñ ham dhuum machā.e bhī ga.e

yaad mat rakhiyo ye rūdād hamārī hargiz

ham the vo tāj-mahal 'jaun' jo Dhaa.e bhī ga.e

KHwab ke rang dil-o-jaan mein sajae bhi gae

phir wahi rang ba-sad taur jalae bhi gae

unhin shahron ko shitabi se lapeTa bhi gaya

jo 'ajab shauq-e-faraKHi se bichhae bhi gae

bazm shoKHi ka kisi ki kahen kya haal-e-jahan

dil jalae bhi gae aur bujhae bhi gae

pusht miTTi se lagi jis mein hamari logo

usi dangal mein hamein daw sikhae bhi gae

yaad-e-ayyam ki ek mahfil-e-jaan thi ki jahan

hath khinche bhi gae aur milae bhi gae

hum ki jis shahr mein the sog-nashin-e-ahwal

roz is shahr mein hum dhum machae bhi gae

yaad mat rakhiyo ye rudad hamari hargiz

hum the wo taj-mahal 'jaun' jo Dhae bhi gae