KHwab ki haalaton ke sath teri hikayaton mein hain

ḳhvāb kī hālatoñ ke saath terī hikāyatoñ meñ haiñ

ham bhī dayār-e-ahl-e-dil terī rivāyatoñ meñ haiñ

vo jo the rishtā-hā-e-jāñ TuuT sake bhalā kahāñ

jaan vo rishtā-hā-e-jāñ ab bhī shikāyatoñ meñ haiñ

ek ġhubār hai ki hai dā.era-vār pur-fishāñ

qāfilā-hā-e-kahkashāñ tañg haiñ vahshatoñ meñ haiñ

vaqt kī darmiyāniyāñ kar ga.iiñ jāñ-kanī ko jaañ

vo jo adāvateñ ki thiiñ aaj mohabbatoñ meñ haiñ

partav-e-rañg hai ki hai diid meñ jāñ-nashīn-e-rañg

rañg kahāñ haiñ rūnumā rañg to nik.hatoñ meñ haiñ

hai ye vajūd kī numūd apnī nafas nafas gurez

vaqt kī saarī bastiyāñ apnī hazīmatoñ meñ haiñ

gard kā saarā ḳhānumāñ hai sar-e-dasht-e-be-amāñ

shahr haiñ vo jo har tarah gard kī ḳhidmatoñ meñ haiñ

vo dil o jaan sūrateñ jaise kabhī na thiiñ kahīñ

ham unhīñ sūratoñ ke haiñ ham unhīñ sūratoñ meñ haiñ

maiñ na sunūñgā mājrā ma.arka-hā-e-shauq kā

ḳhuun ga.e haiñ rā.egāñ rañg nadāmatoñ meñ haiñ

KHwab ki haalaton ke sath teri hikayaton mein hain

hum bhi dayar-e-ahl-e-dil teri riwayaton mein hain

wo jo the rishta-ha-e-jaan TuT sake bhala kahan

jaan wo rishta-ha-e-jaan ab bhi shikayaton mein hain

ek ghubar hai ki hai daera-war pur-fishan

qafila-ha-e-kahkashan tang hain wahshaton mein hain

waqt ki darmiyaniyan kar gain jaan-kani ko jaan

wo jo adawaten ki thin aaj mohabbaton mein hain

partaw-e-rang hai ki hai did mein jaan-nashin-e-rang

rang kahan hain runuma rang to nikhaton mein hain

hai ye wajud ki numud apni nafas nafas gurez

waqt ki sari bastiyan apni hazimaton mein hain

gard ka sara KHanuman hai sar-e-dasht-e-be-aman

shahr hain wo jo har tarah gard ki KHidmaton mein hain

wo dil o jaan suraten jaise kabhi na thin kahin

hum unhin suraton ke hain hum unhin suraton mein hain

main na sununga majra marka-ha-e-shauq ka

KHun gae hain raegan rang nadamaton mein hain