KHwab mein wo mere aaghosh mein aa jata hai

ḳhvāb meñ vo mire āġhosh meñ aa jaatā hai

merī sotī huī taqdīr jagā jaatā hai

gul-o-shabnam kā ye hotā hai chaman meñ anjām

hañs ke koī to koī ro ke chalā jaatā hai

josh par fasl-e-bahārī hai chaman meñ sayyād

ab qafas meñ to nahīñ ham se rahā jaatā hai

miT gayā huuñ vo sitam se nahīñ ġhāfil phir bhī

merī turbat kā nishāñ aa ke miTā jaatā hai

jal ke parvāna huā ḳhaak to us ke ġham meñ

muñh dhuāñ sham.a kā mahfil meñ huā jaatā hai

aap ne baiTh ke bālīñ pe jise dekhā thā

aaj duniyā se vo bīmār uThā jaatā hai

apne andāz pe aisā na ho āshiq ho jaa.e

ā.ina-ḳhāne meñ vo mahv-e-adā jaatā hai

yaad kartā nahīñ bhūle se vo tujh ko 'naushād'

haa.e tū jis kī mohabbat meñ miTā jaatā hai

KHwab mein wo mere aaghosh mein aa jata hai

meri soti hui taqdir jaga jata hai

gul-o-shabnam ka ye hota hai chaman mein anjam

hans ke koi to koi ro ke chala jata hai

josh par fasl-e-bahaari hai chaman mein sayyaad

ab qafas mein to nahin hum se raha jata hai

miT gaya hun wo sitam se nahin ghafil phir bhi

meri turbat ka nishan aa ke miTa jata hai

jal ke parwana hua KHak to us ke gham mein

munh dhuan shama ka mahfil mein hua jata hai

aap ne baiTh ke baalin pe jise dekha tha

aaj duniya se wo bimar uTha jata hai

apne andaz pe aisa na ho aashiq ho jae

aaina-KHane mein wo mahw-e-ada jata hai

yaad karta nahin bhule se wo tujh ko 'naushad'

hae tu jis ki mohabbat mein miTa jata hai