KHwab mein ya KHayal mein mujhe mil

ḳhvāb meñ yā ḳhayāl meñ mujhe mil

tū kabhī ḳhadd-o-ḳhāl meñ mujhe mil

mere dil kī dhamāl meñ mujhe dekh

mere sur merī taal meñ mujhe mil

merī miTTī ko aañkh dī hai to phir

kisī mauj-e-visāl meñ mujhe mil

mujhe kyuuñ arsa-e-hayāt diyā

ab inheñ māh-o-sāl meñ mujhe mil

kisī sub.h-e-firāq meñ mujhe chhoḌ

kisī shām-e-malāl meñ mujhe mil

tū ḳhud apnī misāl hai vo to hai

isī apnī misāl meñ mujhe mil

tere shāyān-e-shāñ hai vasf yahī

kisī vaqt-e-muhāl meñ mujhe mil

mere kal kā pata nahīñ merī jaañ

tū abhī mere haal meñ mujhe mil

mujhe mil ke 'urūj de yā na de

mere vaqt-e-zavāl meñ mujhe mil

KHwab mein ya KHayal mein mujhe mil

tu kabhi KHadd-o-KHal mein mujhe mil

mere dil ki dhamal mein mujhe dekh

mere sur meri tal mein mujhe mil

meri miTTi ko aankh di hai to phir

kisi mauj-e-visal mein mujhe mil

mujhe kyun arsa-e-hayat diya

ab inhen mah-o-sal mein mujhe mil

kisi subh-e-firaq mein mujhe chhoD

kisi sham-e-malal mein mujhe mil

tu KHud apni misal hai wo to hai

isi apni misal mein mujhe mil

tere shayan-e-shan hai wasf yahi

kisi waqt-e-muhaal mein mujhe mil

mere kal ka pata nahin meri jaan

tu abhi mere haal mein mujhe mil

mujhe mil ke 'uruj de ya na de

mere waqt-e-zawal mein mujhe mil