KHwabon ki kirchiyan meri muTThi mein bhar na jae

ḳhvāboñ kī kirchiyāñ mirī muTThī meñ bhar na jaa.e

ā.inda lamha ab ke bhī yūñhī guzar na jaa.e

rassī laTak rahī hai gale ko na bheñch le

ḳhanjar chamak rahā hai badan meñ utar na jaa.e

muñh phāḌtī haiñ ghar kī darāḌeñ idhar udhar

ik qahqaha ki jaise fazā meñ bikhar na jaa.e

kyuuñ us ke saath hī na rahā jaa.e chand roz

jo aadmī ki raat meñ bhī apne ghar na jaa.e

kyā jaane baat kyā hai ki ruktā nahīñ koī

kab se pukārtā huuñ ki koī udhar na jaa.e

kaise phir apne aap ko zinda kahūñgā maiñ

ik aur shaḳhs mujh meñ hai shāmil vo mar na jaa.e

jis ko ki urf-e-ām meñ kahte haiñ zindagī

ye nashsha apne vaqt se pahle utar na jaa.e

KHwabon ki kirchiyan meri muTThi mein bhar na jae

aainda lamha ab ke bhi yunhi guzar na jae

rassi laTak rahi hai gale ko na bhench le

KHanjar chamak raha hai badan mein utar na jae

munh phaDti hain ghar ki daraDen idhar udhar

ek qahqaha ki jaise faza mein bikhar na jae

kyun us ke sath hi na raha jae chand roz

jo aadmi ki raat mein bhi apne ghar na jae

kya jaane baat kya hai ki rukta nahin koi

kab se pukarta hun ki koi udhar na jae

kaise phir apne aap ko zinda kahunga main

ek aur shaKHs mujh mein hai shamil wo mar na jae

jis ko ki urf-e-am mein kahte hain zindagi

ye nashsha apne waqt se pahle utar na jae