KHwahish-e-taKHt na ab dirham-o-dinar ki gunj

ḳhvāhish-e-taḳht na ab dirham-o-dīnār kī guuñj

vādī-e-chashm meñ hai hasrat-e-dīdār kī guuñj

zaḳhm-dar-zaḳhm suḳhan aur bhī hotā hai vasī.a

ashk-dar-ashk ubhartī hai qalamkār kī guuñj

kaash merī bhī samā.at ko Thikāna de de

dasht-e-mahshar meñ tire sāya-e-dīvār kī guuñj

āhaTeñ bhī nahīñ karte mire a.amāl kabhī

ek āvāz nihāñ hai mire kirdār kī guuñj

jab bahut ġhaur kiyā hai to sunā.ī dī hai

muflis-e-shahr kī chup meñ kisī zardār kī guuñj

jis ne sūkhī huī miTī se banā.e kuuze

shahr-e-zamzam se uThī hai usī fankār kī guuñj

ek muddat se bhaTaktī huī phirtī hai 'salīm'

kūcha-e-dil meñ mohabbat ke talab-gār kī guuñj

KHwahish-e-taKHt na ab dirham-o-dinar ki gunj

wadi-e-chashm mein hai hasrat-e-didar ki gunj

zaKHm-dar-zaKHm suKHan aur bhi hota hai wasia

ashk-dar-ashk ubharti hai qalamkar ki gunj

kash meri bhi samaat ko Thikana de de

dasht-e-mahshar mein tere saya-e-diwar ki gunj

aahaTen bhi nahin karte mere aamal kabhi

ek aawaz nihan hai mere kirdar ki gunj

jab bahut ghaur kiya hai to sunai di hai

muflis-e-shahr ki chup mein kisi zardar ki gunj

jis ne sukhi hui miTi se banae kuze

shahr-e-zamzam se uThi hai usi fankar ki gunj

ek muddat se bhaTakti hui phirti hai 'salim'

kucha-e-dil mein mohabbat ke talab-gar ki gunj