KHwahish karke gham ko muKHatib kaun kare

ḳhvāhish karke ġham ko muḳhātib kaun kare

apnā safar sahrā kī jānib kaun kare

zard hue haiñ peḌ ke patte sāvan meñ

ab mausam kā bharosā sāhib kaun kare

ḳhuun se apne sham.eñ jalātā huuñ lekin

din ke jaisā raat kā qālib kaun kare

rutba denā shān-e-karīmī kā hai kaam

miTTī ke putle ko sāqib kaun kare

andhī nagrī ke qānūn nirāle haiñ

faisla mere jurm kā vājib kaun kare

zahar-e-ta.assub ḳhuun meñ sab ke shāmil hai

is mausam meñ baat munāsib kaun kare

merī ġhazal kī qīmat kyā hai duniyā meñ

lahū-lahū uñglī ko kātib kaun kare

sūraj peḌ samundar saa.e haqīqat haiñ

sub.h ko 'ātish' sub.h-e-kāzib kaun kare

KHwahish karke gham ko muKHatib kaun kare

apna safar sahra ki jaanib kaun kare

zard hue hain peD ke patte sawan mein

ab mausam ka bharosa sahib kaun kare

KHun se apne shamen jalata hun lekin

din ke jaisa raat ka qalib kaun kare

rutba dena shan-e-karimi ka hai kaam

miTTi ke putle ko saqib kaun kare

andhi nagri ke qanun nirale hain

faisla mere jurm ka wajib kaun kare

zahar-e-tassub KHun mein sab ke shamil hai

is mausam mein baat munasib kaun kare

meri ghazal ki qimat kya hai duniya mein

lahu-lahu ungli ko katib kaun kare

suraj peD samundar sae haqiqat hain

subh ko 'atish' subh-e-kazib kaun kare