ki KHub wafa humse li KHub KHabar tu ne

kī ḳhuub vafā ham se lī ḳhuub ḳhabar tū ne

din-rāt sitam Dhaa.e ai bāni-e-shar tū ne

kyā ham ne bigāḌā hai kyuuñ ham ko satātā hai

kyuuñ zulm par ai zālim bāñdhī hai kamar tū ne

ai maut ta.ajjub hai jo zīnat-e-gulshan hai

kaaTe vo shajar tū ne toḌe vo samar tū ne

allāh ke bandoñ par ai but ye sitam tere

rakkhā na qayāmat kā kuchh ḳhauf-o-ḳhatar tū ne

is terī banāvaT se hai saaf hameñ zāhir

āshiq ke miTāne par bāñdhī hai kamar tū ne

be-kār haiñ ye naale be-sūd haiñ ye aaheñ

khīñchā na agar un ko ai jazb-e-asar tū ne

dil merā jalāyā kyā afsos hazār afsos

barbād kiyā ai but allāh kā ghar tū ne

jo ba.ad-e-fanā tere kuchh kaam nahīñ aayā

kyuuñ jam.a kiyā mun.im vo maal vo zar tū ne

ham dard-e-mohabbat se taḌpā hī kiye lekin

allāh re bedardī dekhā na idhar tū ne

'sābir' ye himāqat hai hai ye tirī nādānī

apne ko jo samjhā hai har ek se dar tū ne

maiñ sabr kā ḳhūgar huuñ hai naam mirā 'sābir'

jābir hai to paayā hai patthar kā jigar tū ne

ki KHub wafa hum se li KHub KHabar tu ne

din-raat sitam Dhae ai bani-e-shar tu ne

kya hum ne bigaDa hai kyun hum ko satata hai

kyun zulm par ai zalim bandhi hai kamar tu ne

ai maut tajjub hai jo zinat-e-gulshan hai

kaTe wo shajar tu ne toDe wo samar tu ne

allah ke bandon par ai but ye sitam tere

rakkha na qayamat ka kuchh KHauf-o-KHatar tu ne

is teri banawaT se hai saf hamein zahir

aashiq ke miTane par bandhi hai kamar tu ne

be-kar hain ye nale be-sud hain ye aahen

khincha na agar un ko ai jazb-e-asar tu ne

dil mera jalaya kya afsos hazar afsos

barbaad kiya ai but allah ka ghar tu ne

jo baad-e-fana tere kuchh kaam nahin aaya

kyun jama kiya munim wo mal wo zar tu ne

hum dard-e-mohabbat se taDpa hi kiye lekin

allah re bedardi dekha na idhar tu ne

'sabir' ye himaqat hai hai ye teri nadani

apne ko jo samjha hai har ek se dar tu ne

main sabr ka KHugar hun hai nam mera 'sabir'

jabir hai to paya hai patthar ka jigar tu ne