kijiye zulm saza-war-e-jafa hum hi hain

kījiye zulm sazā-vār-e-jafā ham hī haiñ

khīñchiye teġh ki muddat se fidā ham hī haiñ

tafta-dil soḳhta-jāñ chāk-jigar ḳhāk-basar

kyā kaheñ masdar-e-sad-gūna-balā ham hī haiñ

nahīñ mauqūf duā apnī to kuchh ba.ad-e-namāz

baiThte uThte jo māñgeñ haiñ duā ham hī haiñ

ye bhī koī tuur se Tuk jalva dikhā chhup jaanā

aur bhī log haiñ tarsāne ko kyā ham hī haiñ

vo jo kahlāte the zīñ-pesh tire yāroñ meñ

jān-e-man ab to hameñ bhuul gayā ham hī haiñ

na barahman kī mashīḳhat hai na ruhbān kī qadr

ab to is mai-kade meñ nām-e-ḳhudā ham hī haiñ

ishva-o-nāz tirā ham se yahī kahtā hai

nahīñ karte jo kabhī tiir ḳhatā ham hī haiñ

be-navāoñ kī tarah aa ke tire kūche meñ

vo jo kar jaate haiñ ik roz sadā ham hī haiñ

aadhī raat aa.e tire paas ye kis kā hai jigar

chauñk mat itnā ki ai hosh-rubā ham hī haiñ

'mus.hafī' Tal ga.e sab mārka-e-ishq ke biich

vo jo Thahre rahe haiñ ek zarā ham hī haiñ

kijiye zulm saza-war-e-jafa hum hi hain

khinchiye tegh ki muddat se fida hum hi hain

tafta-dil soKHta-jaan chaak-jigar KHak-basar

kya kahen masdar-e-sad-guna-bala hum hi hain

nahin mauquf dua apni to kuchh baad-e-namaz

baiThte uThte jo mangen hain dua hum hi hain

ye bhi koi tur se Tuk jalwa dikha chhup jaana

aur bhi log hain tarsane ko kya hum hi hain

wo jo kahlate the zin-pesh tere yaron mein

jaan-e-man ab to hamein bhul gaya hum hi hain

na barahman ki mashiKHat hai na ruhban ki qadr

ab to is mai-kade mein nam-e-KHuda hum hi hain

ishwa-o-naz tera hum se yahi kahta hai

nahin karte jo kabhi tir KHata hum hi hain

be-nawaon ki tarah aa ke tere kuche mein

wo jo kar jate hain ek roz sada hum hi hain

aadhi raat aae tere pas ye kis ka hai jigar

chaunk mat itna ki ai hosh-ruba hum hi hain

'mushafi' Tal gae sab marka-e-ishq ke bich

wo jo Thahre rahe hain ek zara hum hi hain