kinaya aur Dhab ka is meri majlis mein kam kije

kināya aur Dhab kā is mirī majlis meñ kam kiije

ajī sab taaḌ jāveñge na aisā to sitam kiije

tumhāre vāste sahrā-nashīñ huuñ ek muddat se

basān-e-āhū-e-vahshī na mujh se aap ram kiije

mahārājoñ ke raaja ai junūñ DañDvat hai tum ko

yahī ab dil meñ aatā hai koī pothī raqam kiije

gale meñ Daal kar zunnār qashqa khīñch māthe par

barahman baniye aur tauf-e-dar-e-bait-us-sanam kiije

kahīñ dil kī lagāvaT ko jo yuuñ sūjhe ki tak jā kar

qadīmī yaar se apne bhī ḳhalta koī dam kījiye

tū uñglī kaaT dāñtoñ meñ phulā nathune ruhāñdī ho

lagā kahne bas ab mere buḌhāpe par karam kiije

phaḌaktā aaj bhī ham ko na parsoñ kī tarah rakhiye

ḳhudā ke vāste kuchh yaad vo aglī qasam kiije

malañg aapas meñ kahte the ki zāhid kuchh jo bole to

ishārā us ko jhaT sū-e-nar-añgusht-e-shikam kiije

kabhī ḳhat bhī na likh pahuñchā paḌhāyā aap ko kis ne

ki alqat dostī 'inshā' se aisī yak-qalam kījiye

kinaya aur Dhab ka is meri majlis mein kam kije

aji sab taD jawenge na aisa to sitam kije

tumhaare waste sahra-nashin hun ek muddat se

basan-e-ahu-e-wahshi na mujh se aap ram kije

mahaarajon ke raja ai junun DanDwat hai tum ko

yahi ab dil mein aata hai koi pothi raqam kije

gale mein Dal kar zunnar qashqa khinch mathe par

barahman baniye aur tauf-e-dar-e-bait-us-sanam kije

kahin dil ki lagawaT ko jo yun sujhe ki tak ja kar

qadimi yar se apne bhi KHalta koi dam kijiye

tu ungli kaT danton mein phula nathune ruhandi ho

laga kahne bas ab mere buDhape par karam kije

phaDakta aaj bhi hum ko na parson ki tarah rakhiye

KHuda ke waste kuchh yaad wo agli qasam kije

malang aapas mein kahte the ki zahid kuchh jo bole to

ishaara us ko jhaT su-e-nar-angusht-e-shikam kije

kabhi KHat bhi na likh pahuncha paDhaya aap ko kis ne

ki alqat dosti 'insha' se aisi yak-qalam kijiye