kiran si ek andhere mein jhilmilai hai

kiran sī ek añdhere meñ jhilmilā.ī hai

ye kis kī chashm-e-sahar-ḳhez muskurā.ī hai

Thahar nasīm zarā ham bhī saath chalte haiñ

gul-o-bahār se apnī bhī āshnā.ī hai

junūñ kī raah meñ rukte nahīñ haiñ dīvāne

farār ek dalīl-e-shikasta-pā.ī hai

ye jazb-e-dil kā asar hai ki ik tamāsha hai

idhar huzūr kā banda udhar ḳhudā.ī hai

gila kisī se na kar tere kūche tak saaqī

hameñ bhī gardish-e-daurāñ hī khīñch laa.ī hai

bujhe diyoñ kī zabāneñ dhuāñ ugaltī haiñ

na.ī sahar ne saf-e-tīrgī bichā.ī hai

vahī guloñ pe udāsī vahī fazā meñ sukūt

sunā hai 'tāj' chaman meñ bahār aa.ī hai

kiran si ek andhere mein jhilmilai hai

ye kis ki chashm-e-sahar-KHez muskurai hai

Thahar nasim zara hum bhi sath chalte hain

gul-o-bahaar se apni bhi aashnai hai

junun ki rah mein rukte nahin hain diwane

farar ek dalil-e-shikasta-pai hai

ye jazb-e-dil ka asar hai ki ek tamasha hai

idhar huzur ka banda udhar KHudai hai

gila kisi se na kar tere kuche tak saqi

hamein bhi gardish-e-dauran hi khinch lai hai

bujhe diyon ki zabanen dhuan ugalti hain

nai sahar ne saf-e-tirgi bichai hai

wahi gulon pe udasi wahi faza mein sukut

suna hai 'taj' chaman mein bahaar aai hai