kis bazm mein shama tu nahin hai

kis bazm meñ sham.a tū nahīñ hai

kis jā tirī guftugū nahīñ hai

kis rang meñ jalva-gar nahīñ tū

kis phuul meñ terī bū nahīñ hai

hai parda-e-chashm parda-e-dīd

kis vaqt vo rū-ba-rū nahīñ hai

dīdār kī hai faqat tamanna

dil meñ aur aarzū nahīñ hai

ḳhūbī tirī jalva-gar hai dil meñ

ye aa.ina aib-jū nahīñ hai

sāmān-e-nashāt sab haiñ bekār

mahfil meñ jo ek tū nahīñ hai

kis bazm mein shama tu nahin hai

kis ja teri guftugu nahin hai

kis rang mein jalwa-gar nahin tu

kis phul mein teri bu nahin hai

hai parda-e-chashm parda-e-did

kis waqt wo ru-ba-ru nahin hai

didar ki hai faqat tamanna

dil mein aur aarzu nahin hai

KHubi teri jalwa-gar hai dil mein

ye aaina aib-ju nahin hai

saman-e-nashat sab hain bekar

mahfil mein jo ek tu nahin hai