kis buri saat se KHat le kar gaya

kis burī saa.at se ḳhat le kar gayā

nāma-bar ab tak na aayā mar gayā

jaate hī dil us galī meñ mar gayā

marne vaalā bevafā.ī kar gayā

dil to jaane ko gayā lekin mujhe

us bharī mahfil meñ rusvā kar gayā

hasrateñ thiiñ jiine vaalī jī ga.iiñ

marne vaalā thā dil apnā mar gayā

ġham kī lazzat ibtidā meñ thī magar

is qadar khāyā ki ab jī bhar gayā

har nivāla us kā ab to talḳh hai

umr nemat thī magar jī bhar gayā

kyā kahūñ ahvāl uThtī bazm kā

pahle miinā baad ko sāġhar gayā

dil ne ik din bhī na dekhā tujh ko aah

us galī tak ḳhvāb meñ aksar gayā

marne vaale dil tujhe ab kyā kahūñ

ḳhair baḳhshā maiñ ne jo kuchh kar gayā

kyā kahūñ in āñsuoñ kā zor o shor

āñkheñ jhapkī thiiñ ki chullū bhar gayā

dil gila kartā thā ḳhuub us shoḳh kā

tazkira mahshar kā sun kar Dar gayā

jis jagah daarā ko bhejā thā vahīñ

kuchh dinoñ ke baad askandar gayā

jis kā kahlātā hai vaañ thī kyā kamī

ai gadā kyuuñ māñgne dar-dar gayā

dil ne sabqat kī havās o sabr par

pahle sultāñ baad ko lashkar gayā

muñh se niklā thā ki pahuñchā arsh par

nāla-e-dil naam ūñchā kar gayā

dil ye umDā mai se ḳhālī dekh kar

jaam ashkoñ se labālab bhar gayā

gir na jaa.e ḳhaak par qatra koī

bas bas ai saaqī ki sāġhar bhar gayā

mai-kasho mātam karo ab 'shād' kā

haa.e kyā mai-ḳhvār rahlat kar gayā

'shād' kyā kuchh kam haiñ do kam saaTh saal

zindagī se bas dil apnā bhar gayā

kis buri saat se KHat le kar gaya

nama-bar ab tak na aaya mar gaya

jate hi dil us gali mein mar gaya

marne wala bewafai kar gaya

dil to jaane ko gaya lekin mujhe

us bhari mahfil mein ruswa kar gaya

hasraten thin jine wali ji gain

marne wala tha dil apna mar gaya

gham ki lazzat ibtida mein thi magar

is qadar khaya ki ab ji bhar gaya

har niwala us ka ab to talKH hai

umr nemat thi magar ji bhar gaya

kya kahun ahwal uThti bazm ka

pahle mina baad ko saghar gaya

dil ne ek din bhi na dekha tujh ko aah

us gali tak KHwab mein aksar gaya

marne wale dil tujhe ab kya kahun

KHair baKHsha main ne jo kuchh kar gaya

kya kahun in aansuon ka zor o shor

aankhen jhapki thin ki chullu bhar gaya

dil gila karta tha KHub us shoKH ka

tazkira mahshar ka sun kar Dar gaya

jis jagah dara ko bheja tha wahin

kuchh dinon ke baad askandar gaya

jis ka kahlata hai wan thi kya kami

ai gada kyun mangne dar-dar gaya

dil ne sabqat ki hawas o sabr par

pahle sultan baad ko lashkar gaya

munh se nikla tha ki pahuncha arsh par

nala-e-dil nam uncha kar gaya

dil ye umDa mai se KHali dekh kar

jam ashkon se labaalab bhar gaya

gir na jae KHak par qatra koi

bas bas ai saqi ki saghar bhar gaya

mai-kasho matam karo ab 'shad' ka

hae kya mai-KHwar rahlat kar gaya

'shad' kya kuchh kam hain do kam saTh sal

zindagi se bas dil apna bhar gaya