kis chaman ki KHak mein phulon ka mustaqbil nahin

kis chaman kī ḳhaak meñ phūloñ kā mustaqbil nahīñ

dūrbīñ nazroñ meñ rañg-o-bū haiñ āb-o-gil nahīñ

shoḳhiyāñ haiñ jis kī har jumbish meñ lākhoñ be-naqāb

kyuuñ vo duzdīda-nigāhī haq-shanās-e-dil nahīñ

jabr sahtā huuñ magar kab tak sahūñ insān huuñ

sabr kartā huuñ magar dil sabr ke qābil nahīñ

ai havādis-āshnā īzā-talab dil muzda-bād

jā rahā huuñ us taraf ab maiñ jidhar manzil nahīñ

kyā huā kyuuñ chhū ke tum ġhunche ko pīchhe haT ga.e

ye gul-e-nau-ḳhez hai merā shikasta-dil nahīñ

ai nigāh-e-nāz terī bazm meñ laayā huuñ maiñ

aaj us dil ko jo barq-e-tūr kā qaa.il nahīñ

bazm-e-husn-o-ishq meñ 'akbar' kī afsurda-dilī

daad ke laa.eq nahīñ be-dād ke qābil nahīñ

kis chaman ki KHak mein phulon ka mustaqbil nahin

durbin nazron mein rang-o-bu hain aab-o-gil nahin

shoKHiyan hain jis ki har jumbish mein lakhon be-naqab

kyun wo duzdida-nigahi haq-shanas-e-dil nahin

jabr sahta hun magar kab tak sahun insan hun

sabr karta hun magar dil sabr ke qabil nahin

ai hawadis-ashna iza-talab dil muzda-baad

ja raha hun us taraf ab main jidhar manzil nahin

kya hua kyun chhu ke tum ghunche ko pichhe haT gae

ye gul-e-nau-KHez hai mera shikasta-dil nahin

ai nigah-e-naz teri bazm mein laya hun main

aaj us dil ko jo barq-e-tur ka qail nahin

bazm-e-husn-o-ishq mein 'akbar' ki afsurda-dili

dad ke laeq nahin be-dad ke qabil nahin