kis darja mere shahr ki dilkash hai faza bhi

kis darja mire shahr kī dilkash hai fazā bhī

mānūs har ik chiiz hai miTTī bhī havā bhī

dekho to har ik rang se miltā hai mirā rañg

socho to har ik baat hai auroñ se judā bhī

yuuñ to mire hālāt se vāqif hai zamāna

lekin mujhe miltā nahīñ kuchh apnā patā bhī

saa.e kī tarah saath rahā kartā hai ik shaḳhs

saaya ki huā kartā hai apnoñ se judā bhī

phir zaḳhm-e-tamannā ke na.e phuul khile haiñ

ḳhushbū tirī le aa.ī hai phir mauj-e-sabā bhī

har aan badaltī huī duniyā hai ye 'nādir'

yaañ dil ke lagāne kī nahīñ hai koī jā bhī

kis darja mere shahr ki dilkash hai faza bhi

manus har ek chiz hai miTTi bhi hawa bhi

dekho to har ek rang se milta hai mera rang

socho to har ek baat hai auron se juda bhi

yun to mere haalat se waqif hai zamana

lekin mujhe milta nahin kuchh apna pata bhi

sae ki tarah sath raha karta hai ek shaKHs

saya ki hua karta hai apnon se juda bhi

phir zaKHm-e-tamanna ke nae phul khile hain

KHushbu teri le aai hai phir mauj-e-saba bhi

har aan badalti hui duniya hai ye 'nadir'

yan dil ke lagane ki nahin hai koi ja bhi