kis hatheli pe pa-posh sinche gae kis kahani ko be-nam rakha gaya

kis hathelī pe pā-posh sīñche ga.e kis kahānī ko be-nām rakhā gayā

zānū-e-dil pe kal shab baḌī bhiiḌ thī jis ke barte pe anjām rakhā gayā

ham shurūa mohabbat se nādār the apnī āñkhoñ se hoñToñ se bezār the

ham se kyā pūchhte ho lahū kī khanak jis ke reshoñ meñ ib.hām rakhā gayā

intihāoñ meñ tujh se alag ho ga.e ibtidāoñ se hī sahl-andāz the

'umr ke reg-zāroñ se guzre nahīñ aur shānoñ pe ilzām rakhā gayā

raunaqoñ meñ tamāshā bane raat din ḳhalvatī the sadā ḳhalvatī hī rahe

mushk kī naañd kūlhe pe dekhī ga.ī aur pahlū meñ ilhām rakhā gayā

aisī be-vuq.atī se tarāshā gayā apne hone pe nādim rahe 'umr bhar

ḳhushk miTTī ke Dheloñ ko yakjā kiyā āñdhiyoñ ke tale naam rakhā gayā

ras-bharī kuhniyoñ ko nichoḌā gayā shahr ke chauk meñ lā ke chhoḌā gayā

jism ke Dhīle tāroñ ko kaste rahe aur bhītar meñ kohrām rakhā gayā

goliyoñ se udhaḌte rahe naam bhī bām-o-dar kī hikāyat adhūrī rahī

bām-o-dar kī hikāyat ki jis ke evaz baḳht meñ dāna-o-dām rakhā gayā

jaam meñ tund paanī bharā dekhiye ab charāġhoñ kī lau ko mirā dekhiye

surḳh qālīn aur is pe bichhtī ġhazal jis ke zaanū pe ehrām rakhā gayā

kis hatheli pe pa-posh sinche gae kis kahani ko be-nam rakha gaya

zanu-e-dil pe kal shab baDi bhiD thi jis ke barte pe anjam rakha gaya

hum shurua mohabbat se nadar the apni aankhon se honTon se bezar the

hum se kya puchhte ho lahu ki khanak jis ke reshon mein ibham rakha gaya

intihaon mein tujh se alag ho gae ibtidaon se hi sahl-andaz the

'umr ke reg-zaron se guzre nahin aur shanon pe ilzam rakha gaya

raunaqon mein tamasha bane raat din KHalwati the sada KHalwati hi rahe

mushk ki nand kulhe pe dekhi gai aur pahlu mein ilham rakha gaya

aisi be-wuqati se tarasha gaya apne hone pe nadim rahe 'umr bhar

KHushk miTTi ke Dhelon ko yakja kiya aandhiyon ke tale nam rakha gaya

ras-bhari kuhniyon ko nichoDa gaya shahr ke chauk mein la ke chhoDa gaya

jism ke Dhile taron ko kaste rahe aur bhitar mein kohram rakha gaya

goliyon se udhaDte rahe nam bhi baam-o-dar ki hikayat adhuri rahi

baam-o-dar ki hikayat ki jis ke ewaz baKHt mein dana-o-dam rakha gaya

jam mein tund pani bhara dekhiye ab charaghon ki lau ko mera dekhiye

surKH qalin aur is pe bichhti ghazal jis ke zanu pe ehram rakha gaya