kis jagah jalwa nahin ai mah-e-taban tera

kis jagah jalva nahīñ ai mah-e-tābāñ terā

pā hī jaatā hai tujhe har kahīñ ḳhvāhāñ terā

kaun dekhe tujhe us māh-jabīñ ke hote

muñh udhar ko rahe ai mehr-e-daraḳhshāñ terā

tere saa.e ko bhī tujh tak na phaTakne detā

yaar hotā jo ye nāchīz nigahbāñ terā

kisī āshufta kā kyā sabr paḌā hai us par

kyoñ pareshān hai gesū-e-pareshāñ terā

le ke dil mujh se koī apnā na kaam is se liyā

kaash ā.īna hī hotā dil-e-hairāñ terā

aaj hai vasl kī shab jā bhī tirā muñh kaalā

phir na dikhlā.e ḳhudā muñh shab-e-hijrāñ terā

jaan se tang huuñ par jaan se jā.ūñ kyūñkar

mujh ko marne bhī to detā nahīñ armāñ terā

kaun jaa.e dar-e-dildār se uTh kar vaa.iz

ḳhair achchhā hī sahī rauza-e-rizvāñ terā

sher is meñ nahīñ ye phuul khile haiñ 'shabnam'

huur ke haath kā guldasta hai dīvāñ terā

kis jagah jalwa nahin ai mah-e-taban tera

pa hi jata hai tujhe har kahin KHwahan tera

kaun dekhe tujhe us mah-jabin ke hote

munh udhar ko rahe ai mehr-e-daraKHshan tera

tere sae ko bhi tujh tak na phaTakne deta

yar hota jo ye nachiz nigahban tera

kisi aashufta ka kya sabr paDa hai us par

kyon pareshan hai gesu-e-pareshan tera

le ke dil mujh se koi apna na kaam is se liya

kash aaina hi hota dil-e-hairan tera

aaj hai wasl ki shab ja bhi tera munh kala

phir na dikhlae KHuda munh shab-e-hijran tera

jaan se tang hun par jaan se jaun kyunkar

mujh ko marne bhi to deta nahin arman tera

kaun jae dar-e-dildar se uTh kar waiz

KHair achchha hi sahi rauza-e-rizwan tera

sher is mein nahin ye phul khile hain 'shabnam'

hur ke hath ka guldasta hai diwan tera