kis jagah mera makan tamir hai

kis jagah merā makāñ ta.amīr hai

har taraf zikr-e-kamān-o-tīr hai

rahne do jab tak hai qaa.em rābta

zindagī parchhā.īñ hai tasvīr hai

sab harīs-e-lazzat-e-fāqa-kashī

mas.ala ye kis qadar gambhīr hai

shā.erī ne moḌ aisā le liyā

'dard' hai baaqī na koī 'mīr' hai

ik kalī khil kar yahāñ murjhā ga.ī

zindagī kī kyā yahī ta.abīr hai

'mīr'-o-'ġhālib' 'faiz'-o-'iqbāl'-o-'firāq'

apnī 'ādil' bas yahī jāgīr hai

kis jagah mera makan tamir hai

har taraf zikr-e-kaman-o-tir hai

rahne do jab tak hai qaem rabta

zindagi parchhain hai taswir hai

sab haris-e-lazzat-e-faqa-kashi

masala ye kis qadar gambhir hai

shaeri ne moD aisa le liya

'dard' hai baqi na koi 'mir' hai

ek kali khil kar yahan murjha gai

zindagi ki kya yahi tabir hai

'mir'-o-'ghaalib' 'faiz'-o-'iqbaal'-o-'firaq'

apni 'adil' bas yahi jagir hai