kis ka hai jurm kis ki KHata sochna paDa

kis kā hai jurm kis kī ḳhatā sochnā paḌā

rahte haiñ kyuuñ vo ham se ḳhafā sochnā paḌā

gul kī hañsī meñ raqs-e-nujūm-o-qamar meñ bhī

shāmil hai kitnī terī adā sochnā paḌā

jab bhī mirī vafāoñ kī baat aa ga.ī kahīñ

un ko phir ek uzr-e-jafā sochnā paḌā

ġhunche udaas gul haiñ fasurda chaman chaman

kis kā karam hai bād-e-sabā sochnā paḌā

shāyad tumhārī yaad mire paas aa ga.ī

yā hai mire hī dil kī sadā sochnā paḌā

jab bhī koī bhaTak ke sar-e-rāh aa gayā

kitnī kaThin hai rāh-e-vafā sochnā paḌā

zindāñ kī baat daar ke charche rasan kā zikr

kitnī ajab hai tab-e-rasā sochnā paḌā

kis ka hai jurm kis ki KHata sochna paDa

rahte hain kyun wo hum se KHafa sochna paDa

gul ki hansi mein raqs-e-nujum-o-qamar mein bhi

shamil hai kitni teri ada sochna paDa

jab bhi meri wafaon ki baat aa gai kahin

un ko phir ek uzr-e-jafa sochna paDa

ghunche udas gul hain fasurda chaman chaman

kis ka karam hai baad-e-saba sochna paDa

shayad tumhaari yaad mere pas aa gai

ya hai mere hi dil ki sada sochna paDa

jab bhi koi bhaTak ke sar-e-rah aa gaya

kitni kaThin hai rah-e-wafa sochna paDa

zindan ki baat dar ke charche rasan ka zikr

kitni ajab hai tab-e-rasa sochna paDa