kis ka ye ghar bana hai kis ki gali bani hai

kis kā ye ghar banā hai kis kī galī banī hai

ham to abhī ga.e the phir ye kabhī banī hai

aañsū kā tere qatra hai mez par abhī tak

tū dekh aa ke is meñ ik jal-parī banī hai

do-tīn maah pahle bachchī thī chhoḌī maiñ ne

jaane vo itnī jaldī kaise baḌī banī hai

apnī banā.ī duniyā kā apnā ik maza hai

ye jo banī huī hai ye to banī banī hai

'javvād' chhoḌ kis ne tujh se banā.e rakkhī

bas ye batā de ham ko kis se tirī banī hai

kis ka ye ghar bana hai kis ki gali bani hai

hum to abhi gae the phir ye kabhi bani hai

aansu ka tere qatra hai mez par abhi tak

tu dekh aa ke is mein ek jal-pari bani hai

do-tin mah pahle bachchi thi chhoDi main ne

jaane wo itni jaldi kaise baDi bani hai

apni banai duniya ka apna ek maza hai

ye jo bani hui hai ye to bani bani hai

'jawwad' chhoD kis ne tujh se banae rakkhi

bas ye bata de hum ko kis se teri bani hai