kis ke hathon bik gaya kis ke KHaridaron mein hun

kis ke hāthoñ bik gayā kis ke ḳharīdāroñ meñ huuñ

kyā hai kyuuñ mash.hūr maiñ saudā.ī bāzāroñ meñ huuñ

ġham nahīñ jo beḌiyāñ pahne giraftāroñ meñ huuñ

naaz hai is par ki tere nāz-bardāroñ meñ huuñ

tere kūche meñ jo merā ḳhuun ho ai lāla-rū

surḳh-rū yāroñ meñ huuñ gul-rañg gulzāroñ meñ huuñ

is qadar hai ai parī-rū zor par josh-e-junūñ

sar se toḌūñ qaid agar lohe kī dīvāroñ meñ huuñ

ishq se matlab na thā dil zulf meñ uljhā na thā

thā jab āzādoñ meñ thā ab to giraftāroñ meñ huuñ

hogī māshūqoñ ko ḳhvāhish mujh nahīf-o-zār kī

gul kareñge aarzū merī maiñ un ḳhāroñ meñ huuñ

dil ko dhamkānā hai dhyān us nargis-e-bīmār kā

jaan le kar chhoḌtā huuñ maiñ un āzāroñ meñ huuñ

us mire saude kā duniyā meñ Thikānā hai kahīñ

jaan kā gāhak jo hai us ke ḳharīdāroñ meñ huuñ

kis se pūchhūñ kyā karūñ sayyād kī marzī kī baat

taaza vārid huuñ qafas meñ to giraftāroñ meñ huuñ

aarzū hai maiñ vo gul ho jā.ūñ ai rashk-e-chaman

baaġh meñ din bhar rahūñ shab ko tire hāroñ meñ huuñ

aa gayā dam ziiq meñ lekin na ye sābit huā

kaun hai iisā mirā maiñ kis ke bīmāroñ meñ huuñ

Dariye aisī aañkh se jo saaf ishāre se kahe

nargis-e-bīmār huuñ par mardum-āzāroñ meñ huuñ

dil to maiñ sadqa karūñ tum us pe merī jaan lo

tum hī munsif ho ki maiñ aise gunahgāroñ meñ huuñ

kaun huuñ kyā huuñ kahāñ huuñ maiñ nahīñ ye bhī ḳhabar

ḳhud-ġhalat ḳhud-rafta huuñ maiñ ḳhaak hoshyāroñ meñ huuñ

hai ye abrū kā ishārā thī jahāñ kī zul-fiqār

ai 'sharaf' maiñ us sulah-ḳhānī kī talvāroñ meñ huuñ

kis ke hathon bik gaya kis ke KHaridaron mein hun

kya hai kyun mashhur main saudai bazaron mein hun

gham nahin jo beDiyan pahne giraftaron mein hun

naz hai is par ki tere naz-bardaron mein hun

tere kuche mein jo mera KHun ho ai lala-ru

surKH-ru yaron mein hun gul-rang gulzaron mein hun

is qadar hai ai pari-ru zor par josh-e-junun

sar se toDun qaid agar lohe ki diwaron mein hun

ishq se matlab na tha dil zulf mein uljha na tha

tha jab aazadon mein tha ab to giraftaron mein hun

hogi mashuqon ko KHwahish mujh nahif-o-zar ki

gul karenge aarzu meri main un KHaron mein hun

dil ko dhamkana hai dhyan us nargis-e-bimar ka

jaan le kar chhoDta hun main un aazaron mein hun

us mere saude ka duniya mein Thikana hai kahin

jaan ka gahak jo hai us ke KHaridaron mein hun

kis se puchhun kya karun sayyaad ki marzi ki baat

taza warid hun qafas mein to giraftaron mein hun

aarzu hai main wo gul ho jaun ai rashk-e-chaman

bagh mein din bhar rahun shab ko tere haaron mein hun

aa gaya dam ziq mein lekin na ye sabit hua

kaun hai isa mera main kis ke bimaron mein hun

Dariye aisi aankh se jo saf ishaare se kahe

nargis-e-bimar hun par mardum-azaron mein hun

dil to main sadqa karun tum us pe meri jaan lo

tum hi munsif ho ki main aise gunahgaron mein hun

kaun hun kya hun kahan hun main nahin ye bhi KHabar

KHud-ghalat KHud-rafta hun main KHak hoshyaron mein hun

hai ye abru ka ishaara thi jahan ki zul-fiqar

ai 'sharaf' main us sulah-KHani ki talwaron mein hun