kis ki aamad se bahaaran hua maskan maskan

kis kī aamad se bahārāñ huā maskan maskan

aaj gul khilte rahe chaar sū gulshan gulshan

vo jo uThī thī mirī samt uchaTtī sī nigāh

kar ga.ī raakh sakūñ kā mire ḳhirman ḳhirman

saañs hiddat se kiye rakhtī hai mujh ko sarshār

kaun paikar meñ mire bas gayā dhaḌkan dhaḌkan

dekhiye us but-e-kāfir ke satāne kī adā

ḳhvāb meñ dikhtā hai to bhī pas-e-chilman-chilman

luuT kar le gayā mujh se vo mirā apnā vajūd

ab to apnā sā lage raah kā rahzan rahzan

vaqt ruḳhsat bhī nahīñ aane dī āñkhoñ meñ namī

sub.h-dam tar thā magar phūloñ kā dāman dāman

kaise kah duuñ maiñ nahīñ muntazir us kī 'resham'

tan kī dīvār meñ do āñkheñ haiñ rauzan rauzan

kis ki aamad se bahaaran hua maskan maskan

aaj gul khilte rahe chaar su gulshan gulshan

wo jo uThi thi meri samt uchaTti si nigah

kar gai rakh sakun ka mere KHirman KHirman

sans hiddat se kiye rakhti hai mujh ko sarshaar

kaun paikar mein mere bas gaya dhaDkan dhaDkan

dekhiye us but-e-kafir ke satane ki ada

KHwab mein dikhta hai to bhi pas-e-chilman-chilman

luT kar le gaya mujh se wo mera apna wajud

ab to apna sa lage rah ka rahzan rahzan

waqt ruKHsat bhi nahin aane di aankhon mein nami

subh-dam tar tha magar phulon ka daman daman

kaise kah dun main nahin muntazir us ki 'resham'

tan ki diwar mein do aankhen hain rauzan rauzan