kis ko bahlate ho shishe ka gulu TuT gaya

kis ko bahlāte ho shīshe kā gulū TuuT gayā

ḳhum mire muñh se lagā de jo subū TuuT gayā

kiijo us zulf ko mashshāt samajh kar shāna

laakh dil TuuTe agar ek vo mū TuuT gayā

kuchh ḳhabar hai tujhe kahte haiñ tire zaḳhmī kā

aaj phir chaak kā siine ke rafū TuuT gayā

falak us dil-shikanī kā to mazā dekhegā

koī dil gar kabhī ai arbada-jū TuuT gayā

thī murīdoñ ke liye qalb ke sadme kī dalīl

shaiḳh kā raqs meñ sam par jo vuzū TuuT gayā

dhyān us shīshe kā rakhnā ki na hogā paivand

dil mirī jaan agar yak sar-e-mū TuuT gayā

us ḳhud-ārā ke rahā haath meñ nit ā.īna

ġham se ā.īna-e-dil haa.e na tū TuuT gayā

mohtasib ne to ḳharābāt meñ kī ḳhūñ-rezī

par sar-e-riñd pe shab mai kā kadū TuuT gayā

dekhnā tār-e-mohabbat ki hai mushkil phir sāñTh

rishta-e-dostī ai 'lutf' kabhū TuuT gayā

kis ko bahlate ho shishe ka gulu TuT gaya

KHum mere munh se laga de jo subu TuT gaya

kijo us zulf ko mashshat samajh kar shana

lakh dil TuTe agar ek wo mu TuT gaya

kuchh KHabar hai tujhe kahte hain tere zaKHmi ka

aaj phir chaak ka sine ke rafu TuT gaya

falak us dil-shikani ka to maza dekhega

koi dil gar kabhi ai arbada-ju TuT gaya

thi muridon ke liye qalb ke sadme ki dalil

shaiKH ka raqs mein sam par jo wuzu TuT gaya

dhyan us shishe ka rakhna ki na hoga paiwand

dil meri jaan agar yak sar-e-mu TuT gaya

us KHud-ara ke raha hath mein nit aaina

gham se aaina-e-dil hae na tu TuT gaya

mohtasib ne to KHarabaat mein ki KHun-rezi

par sar-e-rind pe shab mai ka kadu TuT gaya

dekhna tar-e-mohabbat ki hai mushkil phir sanTh

rishta-e-dosti ai 'lutf' kabhu TuT gaya