kis mast ada se aankh laDi matwala bana lahra ke gira

kis mast adā se aañkh laḌī matvālā banā lahrā ke girā

aage to haiñ rāheñ aur kaThin dil pahle hī Thokar khā ke girā

aage jo baḌhā tharrā.e qadam vo hañs jo diye sharmā ke girā

behosh nahīñ hoshyār thā maiñ uThne kā sahārā pā ke girā

dil shauq ke josh meñ dauḌ chalā aur josh to hotā hai andhā

dar band paḌā thā qismat kā Takkar jo lagī teyorā ke girā

jitnī bhī dil kī zarūrat thī bas utnī hī himmat-o-tāqat thī

raste kī khakheḌeñ jhel gayā paas aate hī maiñ chakrā ke girā

kyā ishq kī manzil bhī hai kaḌī bañdh bañdh kar himmat TuuT ga.ī

jo ek qadam chal kar sambhlā vo do qadam aage jā ke girā

sulgī huī hai ġham kī bhaTTī dil kyuuñ na pighal ke bane paanī

jo qatra aañsū ho ke bahā lahrā ke chalā teyorā ke girā

vo naala falak se Takrāyā vo 'ārzū' ik taarā TuuTā

dushman kī taraf jo lapkā thā sho.ala vo mujhī par aa ke girā

kis mast ada se aankh laDi matwala bana lahra ke gira

aage to hain rahen aur kaThin dil pahle hi Thokar kha ke gira

aage jo baDha tharrae qadam wo hans jo diye sharma ke gira

behosh nahin hoshyar tha main uThne ka sahaara pa ke gira

dil shauq ke josh mein dauD chala aur josh to hota hai andha

dar band paDa tha qismat ka Takkar jo lagi teyora ke gira

jitni bhi dil ki zarurat thi bas utni hi himmat-o-taqat thi

raste ki khakheDen jhel gaya pas aate hi main chakra ke gira

kya ishq ki manzil bhi hai kaDi bandh bandh kar himmat TuT gai

jo ek qadam chal kar sambhla wo do qadam aage ja ke gira

sulgi hui hai gham ki bhaTTi dil kyun na pighal ke bane pani

jo qatra aansu ho ke baha lahra ke chala teyora ke gira

wo nala falak se Takraya wo 'arzu' ek tara TuTa

dushman ki taraf jo lapka tha shoala wo mujhi par aa ke gira