kis mohabbat se ye hijrat ke nishan dekhti hai

kis mohabbat se ye hijrat ke nishāñ dekhtī hai

raunaq-e-duniyā mirī aañkh jahāñ dekhtī hai

niiñd dīvār pe baiThī hai parinde kī tarah

mustaqil basne se pahle vo makāñ dekhtī hai

koī chingārī tire aane se shāyad bhaḌke

raakh hotī huī ummīd dhuāñ dekhtī hai

dil kā ye shahr bhī lahore huā jaatā hai

is jahāñgīr ko ik nuur jahāñ dekhtī hai

aañkh to aañkh hai phir ḳhvāb sajā letī hai

ye mirī Dhaltī huī umr kahāñ dekhtī hai

hazrat-e-josh ke dīvān kā jab zikr chale

kitnī hasrat se hameñ urdu zabāñ dekhtī hai

ab kisī moḌ pe rukne kā tasavvur bhī muhāl

merī vahshat tirī majbūrī kahāñ dekhtī hai

kis mohabbat se ye hijrat ke nishan dekhti hai

raunaq-e-duniya meri aankh jahan dekhti hai

nind diwar pe baiThi hai parinde ki tarah

mustaqil basne se pahle wo makan dekhti hai

koi chingari tere aane se shayad bhaDke

rakh hoti hui ummid dhuan dekhti hai

dil ka ye shahr bhi lahore hua jata hai

is jahangir ko ek nur jahan dekhti hai

aankh to aankh hai phir KHwab saja leti hai

ye meri Dhalti hui umr kahan dekhti hai

hazrat-e-josh ke diwan ka jab zikr chale

kitni hasrat se hamein urdu zaban dekhti hai

ab kisi moD pe rukne ka tasawwur bhi muhaal

meri wahshat teri majburi kahan dekhti hai