kis naz se wah hum ko mara

kis naaz se vaah ham ko maarā

kī tirchhī nigāh ham ko maarā

sau pech meñ lā ke āḳhir-e-kār

ai zulf-e-siyāh ham ko maarā

ḳhvāhiñda tire the ai parī ham

kyuuñ ḳhvāh-na-ḳhvāh ham ko maarā

ka.abe ko jo ham chale butoñ ne

kah kar gumrāh ham ko maarā

shikva hameñ kuchh nahīñ falak se

tū ne ai maah ham ko maarā

chāh-e-zaqan-e-sanam dikhā kar

tū ne ai chaah ham ko maarā

aise haiñ za.iif mar ga.e ham

jis ne par-e-kāh ham ko maarā

us kī zulf-e-darāz ne shab

qissa-e-kotāh ham ko maarā

shamshīr-e-nigah se us ne be-maut

ḳhāliq hai gavāh ham ko maarā

bose kī talab meñ us ne 'goyā'

nā-karda-gunāh ham ko maarā

kis naz se wah hum ko mara

ki tirchhi nigah hum ko mara

sau pech mein la ke aaKHir-e-kar

ai zulf-e-siyah hum ko mara

KHwahinda tere the ai pari hum

kyun KHwah-na-KHwah hum ko mara

kabe ko jo hum chale buton ne

kah kar gumrah hum ko mara

shikwa hamein kuchh nahin falak se

tu ne ai mah hum ko mara

chah-e-zaqan-e-sanam dikha kar

tu ne ai chah hum ko mara

aise hain zaif mar gae hum

jis ne par-e-kah hum ko mara

us ki zulf-e-daraaz ne shab

qissa-e-kotah hum ko mara

shamshir-e-nigah se us ne be-maut

KHaliq hai gawah hum ko mara

bose ki talab mein us ne 'goya'

na-karda-gunah hum ko mara